Suplemen Pjj Tgl. 8-14 Maret 2015, Ogen 1 Korinti 12:14-26

• Gelah ngawan perpulungen meteh maka kinierbagen kap kebayaken sue ras ogen
• Gelah ngawan ni perpulungen meteh maka kinierbagen e jadi “potensi” majekken kula Kristus
• Gelah ngawan perpulungen ngasup tetap kerjasama ras serayan Tuhan bagepe perpulungen

Kinata geluh manusia erbage-bage kap. Ibas pendahin, lit perbinaga, si kujuma, si ku kantor erkiteken PNS ntah pe pegawai Swasta, lit TNI, rsd. Ibas hobi pe bage ka. Tole pe misalna ibas rupa, jarang kal jelma e seri, adi mirip banci lit piga-piga tapi adi siperdiateken labo ka seri selerana, peruisna, rsd. Ngkai maka bage? Labo terjabapta secara sempurna, sipasti e kerina labo lepas ras rancangen Dibata. Ijadiken Dibata Adam jenari diberu, e saja enggo berbeda adi bage perpedan labo kelemahen tapi kekuaten, alu kata sideban perbedan arusna sipahami sada kebayaken guna saling melengkapi. Adi la lit petani uga banci lit beras, gule-gulen, rsd?

  Pemahamen enda penting gelah siergan alu bage lit keharmonisen nggeluh. Bagem ibas ogenta 1 Korinti 12:14-26 Paulus ngingetken perpulungen Korinti gelah radu ras ngangkai kinierbagen eme sada realita ntah pe alu kata sideban la terhindarken. Payo kinierbegen enda potensina mbelin erbahansa perpecahen ras e nggo jadi itengah-tengah perpulungen Korinti. Turah erpihak-pihak ibas jemaat, lit singatakenca ia arah Paulus, lit ka singatakenca ia arah Apolos, Petrus, Kristus (1 Ko 1:12). Sienda tentu la ngena ate Dibata sabab palas perpulungen eme kiniteken man Yesus Kristus, janah Yesus Kristus e sada, labo lit dua ntah terbagi; janah palas nggeluh kalak sitek man Kristus eme kekelengen. Kekelengen arusna erbanaca ngasup ngaloken sada ras sidebanna bagi Kristus enggo leben ngkelengi kita ras ngaloken kita uga litna.

Pengajaren sinuate isehken Paulus arah pengogenta erpalasken analogi sada kula melala ringring, eme:

1. Kinata maka kula e mbue ringring iban Dibata, lit takal, mata, nahe, tan, babah, rsd. Enda labo kebetulen, tapi Dibata selaku arsitek si luar biasa enggo irancangNa kula e melala ringring segelah ngasup ia nggeluh erpalasken sura-sura Dibata.
2. Masing-masing ringring lit specialisasina, lit fungsina. Amin gia lit ringring si fungsina tempa la menonjol la banci ipandang rendah sabab ia pe ikut menopang kula e tetap eksis. Bahken ibas ayat 22 ikataken “ringring si tempa-tempa la megegeh e nge si la banci langna”; terdauhen ibas ayat 23 ikataken “ringring si la meherga siakap ibas kula, si nge lebih si pehaga; janah ringring si mehangke encidahkenca, si e nge si lebih siuisi alu mehuli”.

Kai ertina enda man perpulungen Korinti ras man banta genduari? Sipemena, mari si nin ayat 24b “Dibata enggo ngaturken kula alu serasi, seh maka ringring si kurang meherga lebih iergaken”. Enda ertina perbedan e lit ibas rancangen Dibata. Adi e rancangen Dibata maka selaku kalak si erkiniteken arusna la saja menghormati kinita perbedan e tapi pe ngasup nggeluh saling bersinergi, saling menopang, saling melengkapi sada ras sidebanna gelah tujun litna perbedan e tersehi eme perpulungen tetap eksis ibas misina itengah-tengah doni enda eme majekken Kula Ni Kristus. Sipeduaken, mari si nen ayat 25 “gelah kula e la erbelah-belah”. Ertina la lit perpecahen sabab perpecahen nuduhken maka perpulungen la ngergai rancangen Dibata, tentuna kalak si bage labo ngena ate Dibata. Janah perpecahen si lit itengah-tengah perpulungen eme salah sada strategi Iblis ibas menghambat upaya majekken Kula ni Kristus.

Tips segelah ula lit perpecahen tapi sebalikna lit kiniersadan si harmanis eme:

1. Ngangkai maka itengah-tengah perpulungen lit kinierbagen, janah kerina ngawan perpulungen e meherga akap Dibata erkiteken enggo itebusi arah kematen Yesus kristus I kayu persilang, erkiteken sie kerina kita seri ilebe-lebe Dibata(Bd. Kol 3:11). Emaka kai pe merganta, sukunta, kutanta, jabatenta, status sosialta, pendahinta, rsd la banci kita peganjang bana ntah menganggap rendah kalak sideban bagepe sebalikna pekitik banta. Kesombongen la ngena ate Dibata(Bd. Kuan-kuan 16:18). Inget kita enda kerina eme “mantan kalak perdosa” emaka seri nge kita ilebe-lebe Dibata. Payo ibas perpulungen lit Pendeta, Pertua ras Diaken, lit ka pengurus Pjj, kategorial, rsd si e kerina labo nuduhken kita lebih hebat asangken kalak sideban. Inget, kita seri ngenda i lebe-lebe Dibata, amin gia fungsinta pelain-lain. Uga gia belinna ras hagana fungsita ibas perpulungen labo e erbahansa kita peganjangken bana, janah kitik gia fungsinta ibas perpulungen labo e ka erbahansa kita merasa kitik, kurang mehaga. Adi si oge ibas Matius 25:14-30 ije ituriken kerna sekalak tuan si mereken 5 talenta man sekalak juak-juak ras man juak-juak sideban iberena 2 ras 1. Tempa la adil tapi ibas ayat 15 ikatakan “sekalak-sekalak rikutken kengasupen juak-juak e”. Si menarik eme si ndatken 5 ras 2 kenca iusahakenna ulihna erlipat labo lit perbedan penghargan tuan e man bana. Duana nge ikataken “mehuli kal perbahanendu e. Kam juak-juak si tutus dingen bujur; tutus atendu ibas si kitik, perban si e kupercayaken man bandu si terbelinen. Mari bengketlah kam ku bas, ersenang-senang ras aku (ayat 21 ras 23). Tentu man si ngaloken sada pe, adi iusahakenna jenari jadi 2 tentu penghargan pe seri nge man bana eme “mari bengketlah kam ku bas ersenang-senang ras Aku”. Adi bage sipenting man banta kerina eme kai pe fungsinta ibas perpulungen sidahiken alu tutus gelah kerina kita pagi atan bengket ku rumah Bapa ersenang-senang ras Ia.
2. Bagi nina Paulus ibas 1 Korinti 3:7 “Si nuanca ras si niramsa labo penting, tapi si penting e me Dibata, sabap ia nge si peturahsa”. Arah ayat enda mpersingeti kita maka kai pe si nilakoken sue ras fungsita arusna eme guna kemulian Dibata, labo sebalikna sabab adi la ipasu-pasu ntah ijujuri Dibata labo banci berhasil, labo banci pantek perpulungen i Korinti, labo banci kita jadi anak-anak Dibata.

DISKUSI (Bagi sienggo iban ibas bimbingen PJJ GBKP).

1. Serayan Tuhan (Pendeta, Pertua ras Diaken) i tengah-tengah perpulungen eme sebage “pelayan Tuhan” labo sebage “pejabat”. Kai nge sierbahanca maka lit denga pengangkan maka serayan Tuhan e emekap “pejabat” labo “pelayan Tuhan?” Turikenlah bagepe diskusiken kai dage siarusna silakoken gelah pengangkan serayan Tuhan e lanai sebage “pejabat” tapi “pelayan Tuhan”.
2. Turikenlah kai-kai saja siarus tetap silakoken gelah tetap terjadi kerjasama simehuli antara ngawan ni perpulungen ras serayan Tuhan bagepe sebalikna! 

Pdt. S. Brahmana