Pekan Penatalayanan Wari 5 Thn 2020 ; Ulangen 31 : 7 - 8

Invocatio    : Ngaloi Maria, “Kuendesken diringku man Tuhan. Janah jadilah ibas aku bagi sienggo   ikatakenndu  e!” (Luk. 1 : 38a)

Ogen           : 2 Korinti 8 : 10 - 12

Khotbah      : Ulangen 31 : 7 - 8

Tema          : “TETAPKENLAH UKUR DINGEN TEK”

KATA PERLEBE

Malem ateta dingen patut sikataken bujur man Tuhan ibas kerina penemani ras pengkawalina kegeluhenta seh bengket kita ku Tahun si mbaru enda lit ibas mejuah-juah. Erbage-bage hal si reh kubas kegeluhenta subuk secara pribadi, jabu bagepe ibas persadanta itengah-tengah gerejanta tapi si e kerina banci sibentasi ibas perkuah ate Tuhan. Labo erkiteken kita pantas ntah pe metunggung lako bengket kubas tahun si mbaru enda tapi sura-sura Dibata maka ipebengketna kita kubas tahun si mbaru enda guna tole ngenanami lias ateNa bagepe naksikenca itengah-tengah doni enda arah kegeluhen ras kinitekenta. Lenga sieteh kai si jadi pepagi ibas kegeluhenta, ibas si e me maka perlu kel sipetetap ukur ras pengarapenta man Dibata alu tetatp nggeluh ibas persadan sinteguh ras IA. Alu bage lanai lit bera-bera ibas ukurta guna ndalani wari-wari kegeluhen ibas tahun si mbaru enda sebab tek kita maka Dibata alu lias ras perkuah ateNa tetap nemani ras engkawali kita kerina.

PENJELASEN TEKS

2 Korinti 8 : 10 - 12

Ibas ogenta enda teridah maka Paulus nehken katana man perpulungen i Korintus, ija perpulungen enda bayak ibas pemere Dibata tapi ibas kinata kegeluhen ras kinitekenna lenga erbuah. Enda isehken Paulus sebagai sada motivasi segelah perpulungen e tetap min ikut muat bagin ibas dahin-dahin kinulin bagepe ibas nampati. Enda labo terjeng jadi motivasi tapi pe sebagai kritik si cukup meser man perpulungen erkiteken Paulus nuriken usihen-usihen sienggo ibahan perpulungen si lit i Makedonia (Filipi, Tesalonika, Berea, rsd). Ija amin pe perpulungen e lit ibas kiniseran bagepe perbeben tapi tetap icidahkenna kekelengenna alu mpepulung penampat / dana nandangi kalak si tek dingen musil i Jerusalem. Kiniulin ukur perpulungen enda baci jadi erkiteken Perkuah Ate Tuhan si njemba ia lako mediate ras kepate man kalak si deban. Perpulungen Korintus sampur kel ibas pemere-pemere Dibata : ibas ngerana, ibas kiniteken, ibas pemeteh, ibas ketutusen ibas kai-kai pe (ayat. 7), emaka ipindo Paulus pe maka perpulungen pe sampurkalah min keriahennna ibas dahin kekelengen bagepe ibas nampati. Jesus Kristus me arusna jadi usihen kegeluhen perpulungen, ija amin pe bayak IA tapi guna kiniulin anak-anakNa, ipemusilna baNa gelah arah kemusilenNa jadi bayak kita. Ieteh Paulus maka lit nge ukur si mehuli, ukur singgit nampati ibas kegeluhen perpulungen Korintus; tapi ukur simehuli e labo lit gunana adi la kin icidahken arah sada tindaken nyata. Emaka nina Paulus : teruskenlah, dungilah dahin sienggo ibenakenndu e (ay. 10-11). Ertina maka kiniulin ukur perpulungen e teridah arah keriahen ukur lako ikut muat bagin ibas nampati kalak musil. Ukur si mehuli bagepe pemere siisehken alu dem keriahen e tentu ialoken Dibata.

Ulangen 31 : 7 - 8

Ibas perdalanen bangsa Israel i taneh Mesir nari erbage-bage hal siterjadi si jadi pengalamen kiniteken man bangsa enda kerna penemani ras pengkawali Dibata bangsaNa. Musa selaku peminpin siipercayaken Dibata lako mabai bangsaNa enggo ndalanken tugas ras tanggungjawabna alu dem kesetiaan. Ibas perikopta ituriken maka bangsa Israel enggo seh igerbang taneh perpadanen e, eme Kanaan tapi Musa jine la ibere Dibata bengket kubas taneh Kanaan e. Josua me ipercayaken lako nggantiken Musa minpin bangsa Israel bengket ku taneh Kanaan. Lit dua masalah ibas bangsa Israel bengket ku taneh Kanaan eme : 1). Israel eme bangsa si ndarat ibas perbudaken nari, emaka labo lit persiapenna lako erperang ras bangsa si ijumpaina i taneh Kanaan. Labo lit pasukan perang ntah pe peralaten guna erperang; 2). Jasua pernah minpin bangsa Israel erperang ngelawan bangsa Amalek (Kel. 17 : 8 - 16) tapi e enggo 40 tahun si lewat, genduari Josua enggo metua. Ngasup nge ia minpin bangsa Israel bengket ku Taneh Kanaan e?

Labo lit ise pe si banci njaminsa maka Josua selaku manusia biasa ngasup mabai bangsa Israel bengket ku taneh Kanaan e. Tapi Dibata ngasup! Erkiteken si e, ipedahken Musa man bangsa Israel bagepe Josua selaku peminpin lako tetap ngendesken diri ras kegeluhenna iteruh kuasa Dibata. Dibata nge simperlengkapi Josua lako minpin bangsa e guna naluken bangsa Kanaan. Ula ngandalken gegeh ras kengasupen manusia tapi bangsa Israel bagepe Josua tetap ngandalken gegeh ras kuasa Dibata sebab kalak si ngandalken Dibata pasti la njuru ibas kegeluhen enda.

PENGKENAINA

1. Tek kita maka keleng ate ras perkuah ate Dibata nge sipebengket kita kubas tahun simbaru enda, emaka  tek ka pe kita maka IA me tetap sinemani ras engkawali kita ibas ndalani tahun 2020 enda. Mbicara kai pe sijadi ibas kegeluhenta ibas tahun enda, ula bene kiniteken ras pengarapenta man Dibata sebab tek kita maka ibas kai pe Dibata tetap erdahin guna kiniulin anak-anakNa, dingen kai pe sijadi ibas geluhta enda la ngasup nirangken kita ras keleng ate Dibata (Roma 8 : 28, 38)

2. Tetapkenlah Ukur Dingen Teklah. Maka banci tetap ukurta ibas ndalani kegeluhen enda, payo min penandainta kerna Dibatanta. Kalak si payo penandaina Dibata siisembahna e lanai bera-bera, lanai aru atena ibas ndalani kegeluhen. Enda banci sialoken erkiteken persadanta ras Tuhan enteguh, lit tetap hubungen sipayo ras Tuhan, ketutusen ibas ersembah dingen kesetiaan lako nggeluh ibas kataNa.

3. Tek labo sekedar ngataken maka kita anak Tuhan, kalak Kristen sienggo itebusi Dibata arah Kristus.

Melala kalak si alu babahna muji Tuhan tapi kegeluhenna labo iendeskenna man Tuhan. Kalak si tek, kegeluhenna (ukur, pengerana ras perbahanennna) lit ibas “kendali” kuasa Dibata (band. Invocatio). Iberekenna dirina lako ipakeken Dibata nehken sura-sura Dibata dingen jadi pasu-pasu man kegeluhen enda. Lanai ia ernalem man diri, gegeh, pemetehna bagepe man doni enda tapi ernalem ia man Dibata; Dibata me sijadi peminpinna ibas ndalani kegeluhenna.

4. Tetapkenlah ukurta dingen tek maka ibas tahun 2020 enda pe pasu-pasu Dibata tetap nge lit dingen sampur kubas kegeluhenta. Emaka ula mbiar ibas ndahin-dahin simehuli, nggeluh berbagi man kalak si deban, nampati kalak si memerluken. Ula jadi kalak kristes si megegeh mindo pasu-pasu tapi metahat guna jadi pasu-pasu man kalak si deban. Sebab buah kinitekenta man Dibata epe salah sada banciteridah arah kengasupenta jadi pasu-pasu ku bas kegeluhen enda.

Pdt. Elba P. Barus, S.Th

GBKP Bandung Timur