Pekan Kebaktian Keluarga Wari VII ; Roma 1 : 1 -7
Invocatio : “ Terpujilah Dibata i bas Surga si meganjangna. Janah dame i doni man manusia si ngena AteNa” (Lukas 2 : 14)
Ogen : Jesaya7 : 13 – 15
Kotbah : Roma 1 : 1 – 7
Tema : Jabu Si Ngaloken Hak Istimewa
1. Kata Perlebe.
Erpalasken Masmur 1 : 1 – 3, eme tema umumta ibas Pekan Kebaktin Keluarga enda, ikataken maka kemalemen ate kalak sitek man Dibata eme la megiken pedah kalak jahat, si la ngusih perbahanen kalak perdosa.Tapi keriahen kalak sitek eme matuhi undang-undang Tuhan dingen ngukurisa suari ras berngi. Bagepe kalak singgeluh ibas kata Dibata, kegeluhenna bali ras batang kayu si torah ibas tepi lai anak. Ibas berngi sipepituken enda kita ibabai kubas sada tema : “ Jabu Si Ngaloken Hak Istimewa “ ertina kita sebagai anak-anak Dibata sienggo ngaloken ketubuhenNa, ibereNa hak istimewa eme meritaken Berita Si Meriah.
2. Isi
Arah pembuka Surat Paulus, ia mpetandaken dirina, bahwa ia eme suruh-suruhen Kristus Yesus, sienggo ipilih Dibata dingen si iserapken Dibata guna meritaken berita simeriah. Sebagai suruh-suruhen Kristus Yesus ; nuduhken maka kegeluhen Paulus eme mutlak taat, tunduk, dingen patuh nandangi Kristus Yesus siengo ndilo ia jadi rasulNa guna mberitaken kerna kinirajan surga. Paulus mberitaken Yesus mulai ibas ketubuhenNa, kiniseran, kematen, kekekenNa, kenangkihenNa ras nusurna Kesah Si Badia.
Sebagai bukti bahwa Dibata ndilo Paulus, icidahkenna arah semangatna mberitaken kerna kinirajan Dibata. Tantangen sini reh man bana, la menghambat semangat tapi justru arah tantangen e pengasup ia mereken pergegeh man ngawan perpulungen. Berita sinipeseh Paulus man perpulungen eme gelah perpulungen e labo hanya ngaloken berita kerna Yesus, tapi mabai perpulungen e gelah tek man Yesus.
3. Pengkenaina.
Perlu sisadari maka ketubuhen Yesus Kristus enggo leben i nubuatken ibas padan sindekah
( Jesaya 7 : 13 – 15 ).
Nubuaten enda enggo sialoken, dingen kita sienggo ngaloken keselamaten sirehna ibas Dibata nari eme arah AnakNa Yesus Kristus Tuhanta, ngataken maka kita enggo ipilih Dibata ras kita enggo ngaloken hak istimewa eme jadi anak-anak Dibata atau jadi suruh-suruhen Dibata. Kita sienggo jadi
suruh-suruhen Dibata tentu tugas ras tanggung jawabta eme meritaken kerna kinirajan surge baik arah kata-kata bagepe tentu arah perbahanen. Arah Pekan Keluarga berngi sipepituken enda iajuk kita gelah jabu-jabunta ertanggungjawab meritaken Berita Si Meriah. Tentu mberitaken Berita Si Meriah arah jabu-jabunta, banci sicidahken arah dukungen dana nandangi program gereja. Umpamana ibas nehken persembahen, arah erbahan pertoton safaat nandangi perdalinen gereja, bage tentu jabu-jabunta encidahken arah perbahanen bahwa kita enda eme anak-anak Dibata sienggo ipilih dingen iserapkenNa jadi anak-anakNa. Jadi suruh-suruhen teridah ara kepatuhen, ketaaten, kesetianta nandangi kata Dibata.
Pdt. Abel Sembiring, STh,M.Min,MM
Runggun GBKP Tambun
