Pekan Kebaktian Keluarga Wari 4 ; Kuan-kuanen 15 : 1-5

Invocatio    : "O Tuhan ,  jagai min babahku, eruk min biberku," (Masmur 141:3)

Ogen          : Kolose 3: 18-21

Khotbah     : Kuan-Kuanen 15:1-5

Thema        : Ranan Jabu Si Maba Kegeluhen

1.   Bena Kata

Paus Fransiskus pernah ngataken “keluarga tempat pengampunan”. Lalit keluarga si sempurna. Lalit orangtua si sempurna. Lalit perjabun si sempurna. Lalit anak si sempurna. Kita saling mengeluh kerna sada ras sidebanna. Lalit keluarga si sehat janah keluarga asa ndigan pe labo sehat adi la ipraktekkenna saling mengampuni ibas tengah-tengah jabu. Pengampunen e seh kal pentingna guna kesehaten emosi ras ketahanen pertendin bagepe kinitekenta. Adi lalit pengampunen, tentu keluarga e pe sakit. Eme sebabna keluarga harus jadi ingan si maba kegeluhen, labo kematen, ingan guna ndatken tambar labo ingan nambahi pinakit. Ingan ndatken pengampunen, labo rasa bersalah. Salah sadana si jadi oratenta ibas Pekan Kebaktin Keluarga wari/berngi peempatken eme kerna uga dampakna adi ranan ibas jabu idalanken alu positif ras negatif.

2.   Isi

Kolose 3:18-21 si jadi bahan ogenta mereken inspirasi uga Paulus mereken makna simbaru kerna hubungen si terjadi ibas masyarakat Kristen paksa sie. Makna si itawarkenna tuhu-tuhu sederhana, maka palas arah kerina hubungen eme “ngelakokenca guna Kristus”. Kristus me si jadi palas arah kerina perbahanenta ibas mpeturah ras mpekena-kena keluarga si membentuk masyarakatta. Karl Rahner sekalak teolog Katolik ngataken, “keluarga bukanlah menjadi model gereja, ataupun keluarga adalah bagian dari gereja. Gereja itulah keluarga dan keluarga itulah gereja, di mana Allah di tengah-tengahnya”.

Adi siperdiateken bahan ogenta enda ngerana kerna hubungen keluarga Kristen si jadi palas ibas masyarakat. Peran bapa ibas Surat Kolose tuhu-tuhu berbeda. Ibas keluarga Kristen bapa la ncidahken kekuasanna, tapi ncidahken kekelengen man anggota keluarga. Ndehara ibereken perintah guna patuh man perbulangen, janah man perbulangen ibereken dua perintah: “kelengilah” ras “ola kasar”. Hubungen anak ras orangtua iatur alu kalimat “patuh” ras “ola rusursa junguti anak gelah ola bene ukurna”.

Paulus mbenai penjelasenna arah hubungen si seh kal intimna eme hubungen perbulangen ras ndehara. Perlu icatat maka perintah patuh la berlaku man diberu, tapi terjeng man ndehara ibas konteks keluarga. Idarat konteks keluarga lalit perintah man diberu guna patuh man dilaki. Man ndehara, Paulus mereken perintah guna patuh man perbulangen. Amin pe perintah ndehara guna patuh labo hal mbaru, perintah ibas Surat Kolose berbeda. Bedana lit ibas motivasi ntah pe alasen si mendasari sikap patuh ndehara man perbulangen. Bentuk ras tujun hubungen dasar manusia (ndehara-perbulangen, anak-orangtua) la berbeda ras hubungen si lit ibas masyarakat. Tapi, perpulungen Kristen ngelakokenca alu motivasi ras sudut pandang kepatuhen man Kristus. Kata patuh lalit ije kesan nerendahkan martabat diri. Persinget guna patuh iseimbangken ras perintah guna ngkelengi ndehara. Perlu icatat maka kata patuh berbeda ras kata patuh si ipake ibas hubungen anak-orangtua. Ndehara banci saja la matuhi perbulangen erkiteken ndehara lebih matuhi Kristus. Sebalikna, adi ndehara matuhi perbulangen, enda ilakoken sebage tanggapen nandangi kekelengen perbulangen man bana. Paulus nehken alasen ndehara patuh man perbulangen, “sabap bage me arusna ibahanndu selaku kalak Kristen”. Hal enda la berarti maka pada dasarna diberu lebih rendah kodrat ras martabatna asangken dilaki. Perintah patuh ibereken terjeng man ndehara, labo diberu. Paulus sangana ncidahken tatanen hierarki ilahi, ija peran ndehara lit iteruh peran perbulangen (bnd. 1 Kor. 11:3,7-9). Lebih jelasna, hierarki ilahi si bage terungkap ibas Epesus 5:23-24, si ngataken maka perbulangen me takal ndehara, seri bagi Kristus eme takal perpulungen. Hierarki ilahi si bage lalit ije konotasi gender, tapi peran diberu sebage ndehara. Jadi, Paulus la ngataken maka diberu patuh man dilaki, tapi ndehara patuh man perbulangen. Ndehara patuh man perbulangen labo erkiteken bage aturen si berlaku ibas masyarakat. Ndehara patuh man perbulangen labo erkiteken martabat ndehara lebih inferior ibandingken perbulangen. Ndehara patuh man perbulangen erkiteken duana ia gundari iiket ibas sada persadan ibas Kristus. Persadan si ngikutken pola ntah pe tatanen hukum Kristus.

Sendalanen ras usaha ndehara guna patuh man perbulangen, bage ka pe

perbulangen ngkelengi ndehara. Kekelengen perbulangen la itandai ibas masyarakat Junani. Perbulangen sebage kepala keluarga iarapken makeken kuasana nandangi anggota keluarga, labo ngkelengi. Perintah mbaru ibereken Paulus gundari man perbulangen eme “kelengilah ndeharandu”. Istilah “keleng” la isehken ibas kata sifat ntah pe kata benda, tapi kata kerja. Enda berarti kekelengen la bersipat emosi ntah pe perasan, tapi tindaken kekelengen. Perbulangen la terjeng ibere perintah ngkelengi ndehara bagepe ola kasar man ndehara. Perbulangen iperintahken guna la erbahan perbahanen kasar man ndehara. Situhuna pihak si mengalami sakit hati eme perbulangen e jine adi ia berlaku kasar man ndeharana. Ngkai maka bage? Perbulangen membangun hubungen ras berkomunikasi tiap wari ras ndehara, tapi lalit ije kekelengen. Sebage balasenna, perbulangen ndatken balasen arah ndehara eme sikap patuh alu terpaksa ras pekulah-kulah. Sikap si bage tentu saja erbanca sakit hati perbulangen erkiteken la ngaloken balasen bagi siniarapkenna. Balasen si bage ialoken perbulangen si terjeng menuntut sikap patuh arah ndehara tapi la nggit ngkelengi ndehara.

Emaka selanjutna Paulus mereken perintah gelah anak-anak patuh man orangtua. Paulus make kata “patuh” erkiteken kata enda me si menggambarken hubungen Jesus, Anak Dibata, ras Dibata Bapa. Pemaken si bage jelas teridah arah tulisen Paulus man perpulungen Pilipi 2:8, Roma 5:19, Heber 5:8. Pemaken si bage ncidahken maka kepatuhen Kristus man BapaNa jadi model kepatuhen anak man orangtuana. Kai erti “patuh”? Kepatuhen Kristus bagi igambarken ibas Pilipi 2:8 ncidahken perbahanen ndahiken sura-sura BapaNa. Lit perintah ntah pe sura-sura si idahiken seh asa dung. Bapa mereken perintah man Jesus, perintah guna ndahiken sura-suraNa. Jesus ndahiken sura-sura Bapa amin pe e menuntut kesahNa. Ibas pengertin si bage, patuh berarti ndahiken sura-sura seh dung. Anak matuhi orangtua berarti anak ndahiken sura-sura orangtua seh asa dung. Kepatuhen anak man orangtua ibatasi arah perbahanen bagi singena ate Dibata. Adi sura-sura orangtua merupaken tindaken si ngelanggar sura-sura Dibata, anak la ipindo guna matuhi orangtua. Kepatuhen anak man orangtua la bersipat mutlak. Anak-anak harus lebih matuhi Tuhan Jesus asangken orangtuana. Anak-anak matuhi orangtuana ibas kerinana adi kepatuhen e la ngelanggar sura-sura Tuhan. Anak-anak kalak Kristen matuhi orangtuana labo erkiteken nggo kin bage aturen ibas masyarakat, tapi erkiteken bage kin aturen si berlaku ibas keluarga Kristen. Motivasi anak-anak guna patuh eme erkiteken patuh man orangtua bage kin singena ate Dibata. Enda me palas anak-anak guna patuh man orangtuana. Model kepatuhen eme kepatuhen Kristus. Kepatuhen anak man orangtua merupaken aturen si berlaku ibas perpulungen Kristen sikerajangen Kristus, berarti mpegeluhken Kristus ibas hubungen anak-orangtua. Anak iperintahken guna patuh man orangtua. Ibas konteks kepatuhen e, orangtua khususna bapa la banci bertindak bagi ate-atena anakna e. Kata kerja “ola rusursa junguti” ertina eme mengganggu anak dengan mengomeli atau merendahkan mereka. Bapa lit tanggung jawapna guna la erban bene ukur anakna ibas pengertin anak la mere tanggapen negatif nandangi didiken ras ajaren bapana. Ulangen 21:20, “Arus maka ikataken orangtuana bagenda, Anak kami gutul, ngelawan, la ngikutken kata; dahinna mbuang-mbuang duit janah ia pemabuk-mabuk”. Orangtua si anakna la terkataken harus maba anakna kempak tua-tua si lit ibas pintu gerbang kuta gelah iajarken. Erban bene ukur anak alu njunguti ia berarti mpebelin anak jadi sekalak si la terkataken. Erkiteken bapa la isuruh makeken kuasana ibas mpebelin anak bagi bapa-bapa pada umumna paksa sie. Tujun bapa guna la njunguti anak eme gelah la bene ukurna. “Bene ukur” berarti tanggapen negatif anak nandangi bapa erkiteken cedana persadan anak ras bapa. Bene ukur ncidahken kempak kegeluhen anak ras orangtua si icedai erkiteken perbahanen bapa si la pentar. Uga gelah bapa la ncedai ukur anakna? Alu kata sideban, uga carana gelah anak mere tanggapen positif nandangi persinget ras didiken bapa? Secara positif sekalak bapa la erban bene ukur anak alu mereken kepercayan man anak-anakna. Sekalak bapa tek man anakna eme ulih hubungen anak-bapa nggo terbangun alu mehuli. Adi lalit kepercayan bapa man anak, lalap curiga, sie ncedai hubungan bapa-anak. Bapa harus mereken kepercayan anakna janah sekalak anak harus menjaga kepercayan si ibereken bapana. Hubungen bapa-anak si ibangun ibabo asas kepercayaan merupaken wujud hubungen si sehat.

Kuan-Kuanen 15:1-5 si jadi bahan khotbahta ngerana kerna kalak benar si pentar ras kalak jahat si bodoh. Topik e iikuti pengajaren kerna karakteristik kalak benar si pentar ras karakteristik kalak jahat si bodoh bagepe dampakna ibas kegeluhenna, bagepe masyarakat sekelewetna. Tuhu-tuhu itekanken pengajaren kerna uga kalak benar si pentar ngerana ibandingken ras kalak jahat si bodoh. Topik enda pe ihubungken ras pengajaren kerna didiken ras persinget. Ibas ayat 1-5, kata kunci si ijumpai eme “ranan”. Kata kunci enda muncul ibas kerina ayat amin pe alu makeken istilah-istilah si berbeda-beda (kata jabap ibas ayat 1; kata ranan kalak pentar ras ranan kalak bodoh ibas ayat 2; ranan mehuli ibas ayat 4; kata ajar ibas ayat 5). Ibas perikop enda icidahken uga seharusna kalak benar ras pentar ngerana, tuhu-tuhu petembil ras kalak jahat si bodoh, pas bagi thema khotbah Pekan Kebaktin Keluarga wari/berngi peempatken enda “Ranan Jabu Si Maba Kegeluhen”.

Alu jabap si melias mantak rawa si gara, tapi jabap si merampus pekeke ate merawa (ay. 1). Pengajaren kerna ranan pentar si pemena banci idatken ibas ayat 1. Pengajaren enda ncidahken seh kal belinna kuasa ranan ibas kegeluhen manusia. Ranan banci ncedai, tapi pe banci mbangun keharmonisen kegeluhen pribadi ras masyarakat. Jabap si melias mantak rawa si gara (ay. 1a). Pengajaren enda kerna uga seharusna sesekalak ngadapi kinirawan, eme alu make ranan si pentar, labo pekulah-kulah. Ranan e lemah lembut seh maka ngasup mpelawes suasana percakapen ntah pe diskusi si panas. Makna istilah Ibrani si ipake guna kata “jabap” labo terjeng mereken jabap kerna penungkunen, tapi mengarah guna ngajuk ntah pe ngaloken ajaken guna sada diskusi. Pengajaren si seri banci idatken ibas Kuan-Kuanen 25:15, “Saber ate rikut ras ranan mehuli, banci erbahan lembab ukur penguasa”. Kontras ras ayat 1a.  Jabap si merampus, tuhu-tuh erban sakit, labo saja la ndungi masalah, malah banci mpekeke rawa kalak.

Ranan kalak pentar dem alu pemeteh, tapi ranan kalak bodoh lalit ertina (ay. 2). Pengajaren kerna ranan kalak pentar ibas ayat 1 iterusken ibas ayat 2. Ranan pentar si imaksud ibas ayat enda eme ranan kalak pentar dem alu pemeteh. Ranan si ibelasken pasti mbedaken kalak benar ras kalak bodoh. Ranan kalak bodoh lalit ertina (ay. 2a). Kalak benar la terjeng nggeluh benar, tapi lit ibas ia pemeteh. Geluhna erpalasken ibas prinsip kebenaren, keadilen ras kiniulin si tuhu-tuhu iperluken guna kesejahteran jelma sinterem (masyarakat) banci ka pe sinehen Kuan-Kuanen 10:3,7 “Kalak bujur kutera pe la ipelepas TUHAN kelihen, tapi sura-sura kalak jahat la ipebentasNa. Kalak bujur jadi kesangapen si lalap inget kalak, tapi kalak jahat meter ilupaken”. Lit ibas ia pemeteh. Istilah Ibrani si ipake guna pemeteh bermakna umum, tapi si imaksud ibas ayat enda eme pemeteh moral, praktis, ntah pe teknis. Jadi, adi kalak benar ngerana, ranan si ibelaskenna la saja ranan si benar, mehuli, adil, ras pentar erkiteken erpalasken pemeteh si iakui masyarakat umum, tapi pe leben ipertimbangken alu mehuli. Kontras ras ayat 2a, ranan kalak bodoh lalit ertina (ay. 2b). Kalak bodoh la saja jahat, tapi pe la nggit ngaloken pengajaren. Kejahaten ras kebodohenna erbanca ia mbelasken hal-hal si jahat ras bodoh, si terbegi lebih jahat ras bodoh erkiteken ibelasken alu sembarangen, la iukurkenna leben.

Kai pe si jadi idah TUHAN i japa pe; iperdiatekenNa kerina perbahanen si jahat ntah pe si mehuli (ay. 3). Ibas pengajaren kerna ranan pentar si benar, ras ranan bodoh si jahat si ncedai keharmonisen kegeluhen ibas ayat ras ayat 2, itambahken sada persinget (ibas bentuk pengajaren si lebih religius) kerna pengawasen Tuhan kerna tiap perbahanen ras ranan manusia. Ibas kerina ingan lit mata Tuhan (ay. 3a). Tindaken mperdiateken ibas ayat enda la terjeng mperdiateken, tapi pe ertimbang ras ngadili bagepe mereken ukumen si seri bagi siilakokenna.

Ranan mehuli mereken kegeluhen, cakap si ngelukai pusuh erbahanca bene ukur (ay. 4). Pengajaren kerna ranan pentar berikutna isehkan ibas ayat 4. Ranan pentar eme ranan simereken kegeluhen. Siate icidahken ibas ayat enda eme seh kal belinna pengaruh ranan nandangi pribadi ntah pe anggota masyarakat. Ranan si pentar ras ibelasken alu tepat banci mereken pengapul, mpepinteri, mpegegehi, ndungi persoalen, mbangun kegeluhen si megiken ranan e. Kontras bagi ayat 4a, ikataken cakap si ngelukai pusuh erbahanca bene ukur (ay. 4b). Cakap si ngelukai pusuh eme ranan si jahat, si ncedai perukuren kalak sideban. Ranan enda erbahan kalak si megikenca putus asa seh maka ranan e ncedai perbahanen bahken kegeluhen kalak sideban. Ranan sibagenda pe banci ncedai keharmonisen kegeluhen masyarakat.

Kalak bodoh la iperdiatekenna ajar bapana, kalak pentar ilakokenna ajar orang tuana (ay. 5). Ranan  pentar berikutna si iajarken ibas ayat 5 eme ranan persinget arah orangtua. Kalak bodoh nulak ajar bapana. Ajaren bapa si keras, ndisiplinken anak, jadi palas kegeluhen moral sekalak anak erkiteken e seharusna irespon alu positif. Kalak bodoh ngenca si bersikap bage. Kontras bagi ayat 5b, si ngaloken ajar orangtuana alu pentar. Kalak pentar ngaloken persinget ras jadi lebih pentar. Persinget si imaksud mungkin persinget umum ntah pe persinget sekalak bapa.

3.   Pengkenaina

Caranta ngerana enda perlu kal ipesikap ntah pe ijaga. Sabap ranan e me gerbang perukuren, arah ranan e kita banci muat kesimpulen mehuli ntah pe maun-maun jadi ka kesimpulen si la mehuli. Emaka perlu si jaga komunikasi jabunta gelah tetap mehuli. Penting tuhu komunikasi e, sabap adi kurang komunikasinta mesunah ka turah kesalahpahamen. Janah komunikasi sedekah enda si terjadi pe maun-maun lanai bagi arusna. Lit orangtua lanai alu manjar-anjar nungkunisa anakta si mungkin melawen mulih sekolah nari. Mis nge rawanta reh nungkunisa. Lit ka orangtua e labo isungkunina pe piah mehuli ntah la mehuli sinidalanken anak-anakta e labo sieteh, dungna ndele me ate. Lit ka orangtua erkiteken gulut ukur ibas pendahin ntah erkiteken lit perjengilen antara bapa ras nande pelampiasenna kena rawa me ibanna anakna. Piah kedungenna ban anak-anak la meteh kai-kai pe, emaka dungna tertekan me mental anak e. Anak si meteh mehuli labo ertina maka la pernah erban salah, tapi nggit robah ibas nggo sadarina erban salah. Melala anak si salah pergaulen e erkiteken la ndatken keleng ate ibas jabuna erkiteken kesibuken orangtua si rusur cekcok seh simulihen. Sie kerina ncedai mental anak-anakta. Selaku orangtua kita iarapken peturah keleng ate nandangi anak-anakta. Adi sisadari kita pe marenda pernah nguda, kita pe pernah gutul la terajarken, siinget uga marenda kinilatihen ras kesabaren orangtuanta ngajarken kita, emaka uga pe percibal anak-anakta si gundari tetap sialo-alo dingen sipekena-kena ia, sebab bage pe perbahanen Dibata mpekena-kena kita. Mbue denga jabu si kurang komunikasi ras keluarga, malah nggo reh mesunahna pe ibahan alat komunikasi tetap denga reh dauhna tempa keluarganta e. Dekahen denga kita mereken waktu guna ngukurken perbeliten jabu saja. Tuhu mbue denga siman pekenanta kerina ibas ranan jabunta guna mpeturah kegeluhen ertina tole-tolen me anak jabunta e adi kita ngerana ula ka min lenga pe kita ngerana nggo mis kal jungut-jungut ibas pusuhna. Si jadi pelajaren man banta ibas ndalankenca eme sibenaken ngerana alu mehuli subuk soal isi rananta e bagepe soal caranta mbelaskenca gelah ula turah rawa kalak sideban. Ula kita merasa gengsi mujiken kelebihen si lit ibas diri anak jabunta. Sebab alu ranan mehuli mpeturah semangat ibas ndalani kegeluhen. Sebab adi nggo lit semangat tentu tambah me gegeh ibas ndalanisa. Emaka man Mamre pe perlu ipersingeti lit min biak spontanitas si berkualitas bagi si ibahan Abraham ibas diri Mamre GBKP. Ulanai spontan merawa adi megelut, enda berkaiten ibas mpedarat ranan si banci ngelukai pusuh kalak si megiken ranan Mamre baik anak jabu bagepe kalak sideban.

Pdt. Andreas Pranata Meliala, S.Th

GBKP Rg. Cibinong