Pekan Kebaktian Wari III : Jakaup 1 : 19 -25

Invocatio  : Adi kam ngerana ula sitik pe belasken cakap si la erturi-turin. Tapi kata- kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa (Epesus 4:29).

Ogen        : Kuan-Kuanen 1:7-10

Khotbah   : Jakup  1 : 19 – 25

Tema        : “Jabu Si Megermet Ndalanken Si Ngena Ate Dibata”

1.   Kata Perlebe

Kalak si nuan tentu ngarap ia gelah si isuankenna e turah mejile ras erbuah. Labo ise pe si nura gelah si isuanna e la erbuah. La terjeng erbuah saja, tapi meramis dingen entebu. Meramis ka dingen manis ka. Bagi sinuan-sinuan e, bage me pe arapen Dibata ras arapenta kerna jabuta. Gelah jabu si ipanteki kita jadi jabu si erbuah. Erbuah kata, pedah, peringet, pergegeh si nibelas subuk ibas diri bapa, nande ras anak-anak i tengah-tengah jabu. Erbuah ertina ibegiken, itinggelken, ipegejapken dingen idalanken ibas geluh si tep-tep wari. Megiken kata dingen ndalankenca enda me si imaksud erbuah.

2.   Isi

Kerina arus metinggel ope pedas ngerana, apai ka sukah merawa (ayat 19-21) Surat Jakup igelari pe surat hikmat ibas Padan Simbaru. Ikataken surat/ kitab hikmat, erkiteken ibassa mereken nasehat/ pedah si banci minter ipakeken ibas kegeluhen si tep-tep wari. Ibas ayat renungenta Jakup mereken pedah praktis kerna megi dingen ndalankenca. Tuhu kerina manusia termasuk kalak si tek jumpa ujin dingen percuban (ayat 12-18). La man sungkunen apai ka man gogon engkai maka kita ikenai ujin ras percuban. Si penting uga ngalaken ras menyikapisa. Nina Kata Dibata si ipeseh Jakup maka kerina kita arus metinggel.

Tupung ujin ras percuban reh man banta, lit 3 kebiasan ras perbahanen si mehuli perlu ibas ngalaken ujin ras percuban eme sipemena,  kerina arus metinggel. Begiken dingen dengkehkenlah lebe. La kap pentar adi kita mis ngerana sipe si tinggelken. Lenga si begi kai sababna, kai urat masalahna, kai latar belakangna, ras uga konteksna jenari minter kita ngerana la kap mehuli ras payo. Maka pentar, tinggelkenlah lebe. Tinggelken arah erbage-bage mbelah pihak nari. Mari kerinalah kita, ula lit si tading-tading ras nadingi ibas metinggel. Kerina kita iperentahken arus metinggel. Kata ‘arus’ ertina wajib, labo pilihen. Nina kuan-kuan Melayu, “Pikir dahulu pendapatan, sesal kemudian tiada berguna. Jiwa kuan-kuan enda ngataken gelah si tinggel lebe ibas persoalen si lit.

Gelah ola terjadi erkadiola. Ngerana ntah muat sada tindaken ope ninggel ras metinggel erbahanca reh serbutna masalah si lit. Sipeduaken, ola minter ngerana (lambat berkata-kata). Minter ngerana labo ndungi masalah ras perbebenta. Ukuri lebe alu teneng ras mbages. Litkenlah ras bahanlah paksa teneng. Ukurilah kai kira-kira nina Tuhan man banta kerna kecibal si lit e. Jenari tentukenlah kai cara si mehulina si man bahanen sope kita ngerana. Sipeteluken, ola sukah merawa. Ula pediat emosita engkuasai kita, tapi kitalah engkuasai emosita. Adi emosita engkuasai kita emosi e nentuken  perbahanenta. Lanai akal sehatta si erkuasa. Emaka kuasailah emosindu, gelah perbahanenta pe terkuasaita (bdk invocation Ep. 4:29). Ola merawa ras sukah merawa jadi kebiasanta. Ingetlah, si biasa e lenga tentu mehuli; si mehuli e nge si man biasanken. Adi kita merawa, sukah merawa, biasana lanai bo si ukuri kai si man belasenken ras man bahanen. Piah kai si ndarat ibas babahta nari lanai bo si mehuli dingen pehuliken. Misalna ndaraten kata-kata rubia-rubai i si lit i Ragunan. Dungna sakit hati pasangenta ras anak jabuta. Banci merawa, tapi ula erdosa. Ola kal bapa, nande (orangtua) ras anak minter ngerana, ngeranai ras sukah merawa kune jumpa persoalen ras masalah. Ola masing-masing minter menempuh jalan sendiri. Tenenglah, jenari begikenlah alu manjar-anjar. Begiken ibas erbage pihak nari. Libatken Tuhan ibas kerina keadan jabu. Sungkun Tuhan kai si arus si dalanken ras si dahiken ibas situasi si bage rupana.

Ola megi-megi saja tapi dalankenlah (ayat 22-24)

Megi eme sada langkah si mehuli tapi lenga bias. Apai ka terjeng megi-megi ngenca. Memang ulin megi asangken la megiken. Tapi adi terjeng megi ngenca jenari labo idalanken e labo mehuli. Begikenlah alu mehuli, begiken alu payo, ras begiken alu ndeher (mendengar dari dekat). Adi si begi alu mehuli ras ibas ndeher nari maka jelas kap pemegita, si begi alu utuh, lengkap. Kenca si begi, jenari siksikilah (evaluasilah). Alu bagenda me maka kita menghindar ibas itipu kalak. Selain gelah ula kita itipu kalak, kita pe perlu metenget gelah ula kita nipu banta alu terjeng megi-megi saja. Banci ninta bas ukurta kita pengikut Tuhan Jesus kap erkiteken si begi KataNa. Tapi ingetlah bahwa kita labo pengikutNa adi lenga si dalanken kataNa (bdk. Joh. 14:23; 15:10-12). Arus maka si begi dingen si patuhi pedahNa. 

Kalak si megi-megi saja tapi la idalanken desken kalak si ercurmin kap. Kalak si ercurmin jenari dung ercurmin tentu minter lupa uga ndai rupana e. Apai ka ndai ercurmin ia tupung erpagi-pagi tentu nggo ndauh kal beda rupana kenca ben wari. Megi penting, tapi la kap bias. Lit 2 cuping 1 babah. 2 tan ras 2 nahe. Ertina, kenca buen kita megi jenari marilah kita ndahikenca ras ndalankenca. La ngadi terjeng megi-megi saja tapi seh ku bas perbahanen. Begi + dahi = jadi mehuli.

Si mperdiateken ras mpergermetken Kata Dibata ipasu-pasuNa (ayat 25)

Kalak si mperdiateken pedah Dibata dingen terus mpergermetkenca, la terjeng megi-megi saja, kalak si bage ipasu-pasu Dibata kap ibas kerina pendahinna. La berarti kerina dahinta rasil, rulih ras kerina kena regana. Tapi bageme nina Tuhanta. Pasu-pasuNa me pendahin anak-anakNa. Ingetlah biak Kata/ pedah Dibata e: serta kap, ngasup mbebasken manusia, ras ngasup nelamatken manusia (ayat 21b).

Temata nina, “Jabu Si Megermet Ndalanken Si Ngena Ate Dibata”. Perdiatekenlah Kata Tuhan jenari terus pergermetken guna dalankenca si ngenaa ateNa. Kerina kita ersura-sura gelah ndatken ras ngaloken pasu-pasu Tuhan. Jabuta ipasu-pasu, kesehatenta ipasu-pasu, pendahinta ipasu-pasu, anak-anakta ipasu-pasu subuk ibas sekolahna, pendahinna, pergaulenna ras masa depanna. Kunci gelah jabuta ipasu-pasu Dibata eme alu mperdiateken Kata ras pedahNa ras terus mpegerketkenca guna ndalankenca. KataNa jadi tendang kegeluhenta, jabuta dingen pendahinta kerina (bdk Masmur 119:105).

Kata Perpudi

Megi, metinggel perlu ras penting. Megi la sembarang megi, terlebih megi Kata ras pedah Dibata. Tapi megi-megisa saja la cukup ras mehuli. Maka mehuli, megi, ukuri jenari ndalankenca ibas kegeluhenta si tep-tep wari. Perdiakenlah KataNa, pegermetken guna ndalankenca. Ketuahen kalak si megiken KataNa dingen si makekenca ibas geluhta si tep-tep wari (Lukas 11:28). Inget ya, tep-tep wari, ula sung ntah pe engkelangi, amin.  

Pdt. Juris Tarigan, MTh

Runggun Depok Lenteng  Agung