Pekan Doa Sedoni Wari V, Ogen Imamat 25:35-38

Invocatio :

Emaka ola pada sitik pe kam mbiar. Aku pekena-kena kam ras anak-anakndu. dage alu kata si melias e, ipetetap Jusup mulihi ukur senina-seninana seh maka malem atena kerina )Kejadin 50:21)

Thema :

Aron Dibata si Ertoto, Si Mpehaga Teman

 

Senina ras Turang ibas Tuhan Yesus,
Kegeluhen kalak Karo ibas paksa si nai terberita kal kerna perbahanen si sampat-sampaten. Enda banci teridah ibas mbangun rumah adat Karo. Mbarenda, guna mbangun Rumah Adat e, kerina anak kuta ersada arih guna majekkenca, kerina kebeluhen ras gegeh si lit ibassa ipakeken guna banci pajek runah adat e. Bage pe dikune lit kalak tandang reh ku kuta e, maka minter nge lit si reh lako ngoratisa kema kai kin keperlunna. La terjeng e, adi lit kalak erjabu ku sada kuta, janah atena ringan i kuta e, maka semal nge kalimbubu mereken perjumanna seh maka lit dahin si man dahinken guna ndatken keperlun geluhna.

 

Emaka, ibas kegeluhen Kalak Karo lit kuan-kuan si ngataken “Si ageng-agengen radu mbiring, Sikuning-kuningen radu megersing” Ertina, adi ibas kegeluhennta si nilakoken kita rusuren ndarami si la payo ibas temanta, maka kegeluhenta labo reh ulina, tapi reh gulutna. Tapi, adi ibas kegeluhenta sinilakoken kita eme uga maka kegeluhen temanta reh sikapna, tentu ulihna pe pasti reh jilena.

 

Senina ras Turang,
Berngi/Wari enda eme paksa si pelimaken kita ndalani Pekan Doanta, janah themanta ibas paksa enda eme Aron Dibata si Ertoto, Si Mpehaga Teman. Gendekna, adi nulih kita kempak kegeluhen nini-nininta ndube (si mungkin langa denga erkiniteken bagi kinitekenta genduari; baca : Kristen), uga nge kecibalta bas paksa enda? Reh ulina nge ntah reh murdena? Ngkai maka ikataken kami bagenda? Sabab, nina jaman genduari enda menam-menam kerina jelma bagi si ipaksa guna “erlumba” ngayaki keperlun geluhna. Janah menam-menam ka nge bagi si mekatep kita megisa maka jaman enda memang reh majuna, tapi kegeluhen reh serana. Lit pe terkuan ibas bahasa Indonesia, nina : “Jangankan cari uang halal, cari uang haram pun susah”. Sedangken selaku kalak si erkiniteken, tetap ipindo man banta maka kita la banci nggeluh ngukurken dirinta saja, tapi perlu tetap kita ikut ngukuri keperlun temanta.

 

Pengogenta pe ncidahken uga aturen nggeluh si ipeseh Tuhan nandangi kalak Israel. Ibas aturen e, si la banci lang arus ilakoken kalak Israel eme nampati temanna si lit ibas kesusahen. Janah ibas nampati, la banci ije kalak Israel ngukuri kai nge untungna man bana ibas ia nampati temanna. Nampati arus ilakoken erpalasken mbiar man Tuhan. Ertina, kalak Israel si man bana lit gegeh lako nampati temanna, tentu man bana enggo ibereken Tuhan pemere si lebih, si man bana enggo me tercukupi keperlunna, janah lit denga iba na. Tuhan enggo mereken pemere si mbelin man kalak Israel eme ibas Tuhan engo mbaba ndarat ibas taneh perkawanen janah itaruhkenNa ku taneh si mehumur si dem alu pasu-pasu Tuhan. Alu bage maka, si ibahanna ntah ipakena guna nehken penampat e eme kai si enggo ibereken Tuhan man bangsa ntah kalak Israel.

 

Pengertin si deban si banci si idah ibas pengogenta enda eme : Manusia e eme mahluk si meherga, aminna gia adi nulih kita kempak kegeluhenna maka sangana mesera kegeluhenna. Banci saja ibas sada paksa erkiteken ntah kai si jadi ibas kegeluhenna, maka kegeluhenna jadi mesera. Ntah pe bage kin ibas kegeluhenna, adi tatapen doni musil kin ia. Tapi adi perdiateken arah ogenta enda, maka man kalak ntah kita si ibereken “kelebihen” ibas Tuhan nari, maka jadi “kewajiben” man banta lako nehken penampat. Ras, penampat e tuhu-tuhu kin penampat, labo tempa-tempa nampati tapi situhuna labo nampati tapi erbahanca temanta e reh susahna. Enda me si ipersingeti maka ibas nampati, palasna eme mbiar man Tuhan ras nggejabken maka e perentahNa kin.

 

Jadi…. Senina ras Turang Kekelengen Tuhan
Ertoto eme biak nggeluh kalak si erkiniteken ras ernalem man Tuhan. Adi ninta maka kita kalak si erkiniteken ras ernalem man Tuhan, maka tentu lit ibas pertotonnta ija kita mindo ku Tuhan seh gelah ibreNa kita pasu-pasuNa. Lebih asa si e tentu ibas pertotonta pe maka si pindo ka pe man Tuhan maka iajariNa ka pe kita guna ngasup ngaturken pasu-pasuNa e. la terjeng man banta saja, tapi pea rah pasu-pasuna e, si pindo pe maka banci arah pasu-pasuNa e, kita makekenca ka guna kalak si deban.

 

Kegeluhenta arah pasu-pasu Tuhan labo erbahanca kalak si deban reh dauhna ras kita. Engkai? Sabab reh buena pasu-pasu Tuhan erbahanca kita “lanai terdeheri”. Tapi, arah pasu-pasu Tuhan, erbahanca kita reh riahna nggeluh ras kalak si deban entah kin e keluarganta, kade-kadenta, teman-temanta, ngawan ni perpulungenta, rasp e banci saja kalak si mbaru denga itandaina ntah si tandai ia.. Engkai? Sabab bali bagi Yusuf, ia ipasu-pasu Tuhan lako banci mpetetap ukur seninana, aminna gia lit si la payo si ilakoken senina-seninana man bana. Labo e si perdiatekenna, tapi si ipernehenna eme uga Tuhan tetap nemani ia ras mereken pasu-pasu si reh simparna.

Bage me pe kita, labo kai si ibahan kalak man banta si erbahanca geluhta jadi mehaga, tapi kai si bahan Tuhanlah si erbahanca geluhta reh mehergana ras reh mehagana. Emaka ula mbiar ibas nehken penampat man si biakna kin man sampaten. Tuhan si masu-masu kita kerina. Amin.

 

Pdt. Benhard Roy Calvyn Munthe
GBKP Rg. Cisalak