Pekan Doa Sedoni wari I, Ogen Perbahanen Rasul-Rasul 4:23-31

Invocatio :

Matius 7:7-8

 

Tema :

Aron Dibata Si Ertoto, Ipegegehi Kesah Si Badia Guna Erberita

 

Penaruh
Ertoto emekap sada bagin si la banci ipisahken ibas kegeluhen kalak si tek man Dibata (aron Dibata). Pertoton si isehken man Dibata emekap kerna pujin bagepe penembahenta man baNa erkiteken mbelin kuasaNa, kerna kinilatungungenta iadep-adepenna, kerna erbage persoalen kegeluhennta bagepe pemindonta man baNa. Erbage-bage usihen si enggo isehken man banta ibas Pustaka SI Badia nari, subuk Padan SI Ndekah bagepe bas Padan Si Mbaru kerna ertoto. Gundari, arah teks Perbahanen Rasul-Rasul 4:23-31 enda, erlajar ka pe kita kerna kuga Petrus ras Johanes bagepe kerina perpulungen ertoto man Dibata.

 

Perbahanen Rasul 4:23-31
Konteks sope teks emekap Perbahanen Rasul 3:1-4:21
Petrus ras Johanes emekap ajar-ajar Jesus si enggo naksiken kerna kuasaNa arah mpepalem sekalak si pangpangen mulai kin tubuhna nari (Perb. Rasul 3:1-10). Kenca si e, bengket ia duana ku bas Rumah Pertoton. Ibas Rumah Pertoton ngerana me Petrus nehken pengajaren si naksiken kerna Jesus si enggo mate janah ipekeke ibas si mate nari. Erkiteken kuasaNa me maka kalak si pangpangen e banci erdalan. Megi pengajaren Kata Dibata si isehken Petrus enda, emaka enterem kel kalak si tek man Tuhan, teremna dilaki si enggo tek e tambah jadi kira-kira lima ribu kalak (Perbahanen Rasul 4:4).

 

Erkiteken pengajaren si enggo isehken Petrus e, eme kap kerna Jesus si enggo keke ibas si mate nari, si nuduhken maka lit kekeken ibas si mate nari, nembeh ate imam ras kepala pengawal Rumah Pertoton ras piga-piga kalak Saduki. Emaka itangkapna me Petrus ras Johanes, jenari itamakenna ku bas penjara seh pagina. Pepagina, Petrus ras Johanes ndalani persidangen i Pengadilen Agama i lebe-lebe pemimpin kalak Jahudi, pertua-pertua, guru undang-undang, imam si mbelin Annas ras Kayafas, bage pe Johanes ras Aleksander ras kalak si mbelin si deban ibas kesusuren imam si mbelin nari. (4:1-7). Banci siidah kuga posisi Petrus ras Johanes ilebe-lebe kerina kalak enda.

Ilebe-lebe Pengadilen Agama enda, Petrus ras Johanes alu setia tetap naksiken kerna Jesus bagepe kuasaNa si enggo mpepalem kalak si pangpangen man kerina kalak si lit hadir ibas Pengadilen Agama e. Janah kalak si enggo ipepalem ibas ke-pangpangenna nari pe hadir janah tedis ije. Tentu saja enda jadi sada kesaksien si mbelin man enterem jelma. Pengadilen Agama e, la ndatken kesalahen si enggo ibahan Petrus ras Johanes, emaka ipulahi me ia duana.

 

Ayat 23 Petrus ras Johanes ibebasken
Kenca Petrus ras Johanes ibebasken, lawes ia duana idahina teman-temanna janah iturikenna kai si enggo idalanina ibas Pengadilen Agama e. Teman-teman siimaksudken ijenda emekap perpulungen kalak si tek man Tuhan si tutus ertoto man Dibata tupung paksa ia ipenjaraken (bd. 12:5).

 

Ayat 24-30 Perpulungen si ertoto
Kai si enggo ituriken Petrus ras Johanes man perpulungen e tentu saja erbahanca meriah ukur man kerina si megikenca. Amin bage gia, erkiteken mbuena ancamen si igejapken, emaka ibabana kerina e ku bas pertoton man Dibata . Nandangi kuasa doni si mengancam kegeluhenna, idaramina, janah ipindona arah pertotonna kerina gegeh kuasa ibas Dibata nari. Perlawanen si mengancam e rehna ibas bangsa-bangsa di deban nari. Ibas pertoton e, ikutip pe Masmur 2 nari. Enggo pulung kerina kalak si erkuasa guna ngelawan Tuhan. Ise si enggo pulung e? Emekap Herodes, Pilatus bagepe bangsa-bangsa/umat Israel. Jelas, maka peristiwa penangkapen Jesus-ija para pemimpin erperan bas si e (nen. Lukas 23:13,35; 20:24)- janahna pe penangkapen Petrus ras Johanes emekap bentuk perlawanen nandangi Dibata bagepe Mesias. Penulaken nandangi Tuhan Yesus iterusken ku bas penulaken nandangi kesaksin rsaul-rasul. Enda penggenapen bas Masmur 2 nari. Mesias/Kristus ertina “si iurapi”. Jelas maka Jesus enggo iurapialu kuasa Kesah Si Badia (10:38), tupung paksa IA iperidiken (Lukas 3:21,22; 4:1, kenca Jesus iperidiken : IA idemi Kesah Si Badia,…).

Perlawanen e terjadi “ibas kuta enda” emekap Jerusalem. Jadi kota enda, labo terjeng jadi titik berangkat Berita Si Meriah (Perb. Rasul 1:8), tapi pe ingan perlawanen siilakoken raja-raja doni. Ikataken pe maka perlawanen e ilakoken bangsa-bangsa (ayat 25, 27) ningetken kerna peranan Pilatus bagepe kalak Romawi nandangi Berita Si Meriah.

Ibas ayat si pe 28-ken, ije isehken maka kalak si tek e pang ngataken maka perlawanen e pe la terlepas ibas kuasa ras peraten Dibata (bd. 2:23). Perpulungen ertoto gelah Dibata ngidah bagepe mperdiateken ancamen-acamen e. Hal enda nuduhkenca maka, ancamen e ihadapi kerina kalak si tek man Tuhan, eme perpulungen Tuhan alu la biar-biaren (Yunani : parresia). La biar-biaren (keberanian) enda, icidahken Petrus ras Johanes i lebe-lebe Pengadilen Agama (ayat 13). Perpulungen e ertoto gelah kinipangen e idukung alu “Dudurken tanNdu guna pepalem kalak si penakiten janah bahanlah maka jadi tanda-tanda sengget si mbelin ibas gelar Jesus persuruhenNdu si Badia e” (ayat 30). Jadi, kalak si pangpangen si enggo ipepalem e, emekap erkiteken kuasa Dibata. Erkiteken si e, Dibata me si ipuji ibas mujizat si enggo terjadi ibas gelar Jesus (Perb. Rasul 3:8,9; 2:19,22)

Ayat 31 Dibata njabab pertoton perpulungen
Dibata megiken pertoton si enggo isehken perpulungen e. Kenca dung kalak e ertoto, mugur-ugur rumah inganna pulung e. Kerina ia dem alu Kesah Si Badia jenari alu ukur si tetap iberitakenna kata Dibata. Ulih pertoton perpulungen e emekap ia kerina idemi Kesah Si Badia si mpegegehi ia kerina guna meritaken Berita Si Meriah alu la biar-biaren.Selain e, teridah pe persadan ukur bagepe persadan penggejapen ibas perpulungen e ibas kegeluhenna si tep-tep wari.

 

Aplikasi

1. Nina Dibata “Pindolah, tentu ngalo me kam; daramilah, tentu idatndu; tuktuklah, tentu italangi pintun man bandu. Sabab si mindo, ngalo, si ndarami dat me, janah si nuktuk, italangi pintun man bana” (Matius 7:7-8). Eme bagin ibas Kotbah Jesus i datas uruk. Si tuhu-tuhu ngajuk kita guna silakoken ibas kegeluhenta, emekap ertoto.
2. Tetaplah setia ertoto (1 Tesalonika 5:17) ibas ndalani kegeluhenta si tep-tep wari ibas kerina situasi keadan kegeluhenta, subuk tupung meriah ukur, ertotolah! Bagepe tupung ibas kesusahen, ertotolah !
3. Benakenlah kegeluhenta tep-tep wari alu pertotonta man Dibata. Totokenlah pendahinta bagepe dahikenlah alu mehuli kai si enggo itotoken kita e. 
4. Ulih pertotonta emekap Kesah Si Badia mabai kita guna la biar-biaren ibas er-Berita Si Meriah man enterem jelma, subuk arah kata bagepe perbahanenta, janah mabai kita kubas kiniersadan ibas perpulungen.

 

Pdt. Crismori V. Br Ginting
(GBKP Yogyakarta)

Sumber :
Brink, H. v. d., Tafsiran Alkitab Kisah Para Rasul,Jakarta : BPK Gunung Mulia, 2008.
Drewes, B. F., Tafsiran Alkitab Kisah Para Rasul, Jakarta : BPK Gunung Mulia, 2014