Bimbingen Pekan Penatalayanen Wari VII, I Korintus 4:1-4

Invocatio :

II Korintus 8:10b
(Kam me si pemena kal ndahiken dahin e, labo saja ndahikenca, tapi pe ukur si ersuruh ndahiken e ibas kam me si pemenana turah)

Ogen :

Yesaya 6:1-8

Khotbah :

I Korintus 4:1-4

Thema:

Suruh-suruhen si la perlu isuruh

 

Nina rasul Paulus ibas I Timotius 1:18 “O Anakkku Timotius, man bandu kusehken dahin enda. Si enda rikutken kata si enggo ndekah me inubuatken kerna kam”. Rasul Paulus nehken enda man Timotius asum ia ndahiken dahin berita si meriah i perpulungen Efesus, ija usiana nguda denga janah tantangen pe labo sitik, baik dari dalam bagepe dari luar. “Man bandu kusehken dahin enda”. Tentuna dahin guna pebelangken berita si meriah sekaligus membina ras melayani, janah Timotius singaloken dahin enda, si enggo ndekah me inibuatken kerna Timotius, ternyata Dibata enggo milih ia nai nari, bahkan nina Dibata man Jeremia, “ope denga kam Tubuh enggo kuserapken kam jadi Nabi man bangsa-bangsa” (Jeremia 1:1).  Ternyata Timotius pe enggo ernubuat Dibata maka ia pagi ndahiken berita si meriah, aminna gia usiana nguda, ertina Dibata enggo netapken man kerina manusia ate-Na ipilih-Na kerina la erpilihen, masing-masing enggo itetapken-Na dahin siman dahinta. Lit jadi Pdt,Pt/Dkn, pengurus kategorial, panitia, pengurus PJJ janah lit jadi guru KAKR bagepe jadi anggota biasa, tapi sienda kerina bekas pemilihen Dibata, janah gunana eme lako ndalanken kai singena ate-Na ibas doni enda.

 

Nabi Jesaya itengah-tengah umat Israel siterus erbahan kejahaten, emaka enggo mesera kal ndatken kalak bujur ras mehuli. Lit kata “cilaka” enam kali ibelasken Dibata nandangi umatna (Yesaya 5:8-22). Mengeriken kal kuga rawa Dibata si enda kerina erkiteken perbahanen Umat-Na sendiri nandangi Dibata, diantarana eme: pebayak bana, la mediate nandangi sideban, mabuk-mabuk ras sidebanna. Emaka Dibata ngutus Malekatna (Serafim) ndahi Jesaya si ngana i rumah pertoton, janah Malekat Serafim enda koor ia guna ngendeken pujin alu ngataken “Badia, Badia, Badia Tuhan si mada kuasa. Badia kap i doni enda dem alu kemuliana.” Enda ngingetken man Nabi Jesaya maka kai pe ibahan umat Israel, Dibata tetap badia,erkuasa ras ndemi kemulian-Na i doni. Janah Jesaya pe mbiar, sebab enggo igejapna maka umat Israel enggo melala kesalahen, janah igejapna maka ia ikut ertanggung jawab ibas si e. Mungkin akapna ia pe ndat ken hukumen “cilaka aku, lanai lit arapen man bangku.”Pengangkunna jine maka ranan si mentas arah biberna dosa krina, janah ia pe ringan i tengah-tengah bangsa si tep-tep kata si belaskenna dem alu dosa. Emaka kerina enggo erdosa, janah patut nge Dibata merawa. Tapi arah perkeleng ate Dibata nandangi umat-Na, maka Dibata memperbaharui Yesaya alu membersihken babah biberna alu rara. Nina malekat e, “Rara enda enggo ngkenai biberndu, emaka gundari salahndu enggo masap janah dosandu enggo ialemi. Luar biasa perkeleng ate Dibata nandangi Nabi-Na si enggo ipilih-Na ras ialemin dosana.Emaka Dibata mulihken mpersikapken Nabi Yesaya guna erberita si meriah. Nina Dibata: “Ise ndia kusuruh? Ise ndia nggit maba berita ibas aku nari?” Jawab Yesaya “ enda aku, suruhlah aku!”. Dibata tetap membuka peluang nandangi kalak si enggo ipilih-Na, aminna gia dahin si man dahin e labo menahan, tapi Dibata mpersiapken dingen membekali kalak si enggo ipilih-Na.

 

Kita si enggo ipilih eme merupaken suruh-suruhen-Na si meritaken berita si meriah e man kerina manusia, janah ibas kita nehken tugas e perlu sisadari maka kita enda enggo me ndekah inubuatken. Emaka kuga pengakunta pendilo e, bagi nina Paulus : “Kami enda suruh-suruhen Kristus, dingen pengurus erta-erta Tuhan si ertanggung jawab kerna rahasia Dibata.” Suruh-suruhen eme si enggo siap katawari pe, tanpa isuruh lanai perlu i suruh. Sebab dahin e enggo itetapken man banta, nai waktu kita ngawanken meritaken berita si meriah ibas GBKP enda, gelah erbelang berita si meriah e. Janah kita me ipercayaken ngurus erta-erta Tuhan, eme ngawan niperpulungen eme erta si meherga ras kinirajan surga harus sisehken man kerina manusia, baik arah perbahanen ras pelayanen.

 

Emaka man kita si enggo ipercayakenna, harus terteki, la banci lain kata pedempak lain kata petundal, tapi kai sini ibelasken eme bagi kai nina bas pusuh (bagi lau mentar i sukanalu), meciho pusuhta, pertanggungjawabken kai si iberitaken kita. Bujur ibas kai pe, la nuntut tapi tanggung jawab, la mengeluh tapi sukacita, aminna gia mberat si man dahinken. Ibas kita ndahiken dahin e maka lanai bagi: Iman pahat palu maka erdahin, iman gerobak dorong maka erdalan, tapi iman paguh tanpa isuruh ia berkat ndahiken dahin Tuhan aku usur ersuruh ndahikenca, sebab kita me sipemenana ipilih-Nya (Invocatio). Bagi nina nabi Jesaya, “Enda aku suruhlah”. Tanpa banyak komentar, tapi pekerjaan semuanya selesai, ras la nimai kalak ras wari pepagi. “Kai banci kudahiken wari enda dahiken, sebab pagi la warinta.” Inget maka pendahin si enggo i ampeken-Nua man banta eme pendahin guna keriahenta ras keriahen kalak si deban, janah dahin e eme guna keselamaten kalak ras pagin negananami kemalemen ate sirehna idur Dibata nari. Janah kai si enggo si akuken ndube paksa kita ngawanken, tangkuhken, lantik maka kerina enda bekas Dibata netapkenca kita masing-masing, janah kerina pagi sipertanggungjawabken man Dibata Tuhan nari.

Salam
Pdt. A. Brahmana
081317054961