Bimbingen Pekan Penatalayanen Wari VI, Lukas 8:1-3

Invocatio :

Mazmur 54:8
(Alu ukur meriah kupersembahken persembahen man baNdum dingen ngataken bujur man baNd, sabap mehuli kap Kam o Tuhan)

Ogen :

Mazmur 22:26-32

 

Khotbah :

Lukas 8:1-3

 

Thema  :

Ngelai Jesus alu kiniliten (Persembahen ras keuangen Gereja)

 

 

Ngelai eme salah sada tugas Gereja si i endesken man kerina ngawan ni perpulungen janah ibas ngelai enda me si lalit kesempaten si isilahken ertina: Hidup adalah pelayanen dan pelayanen adalah hidup. Hal enda me sini ilakoken Yesus sedekah geluh pelayanenNa itengah doni enda. Bagi anak manusia si isuruh Dibata, reh labo guna ielai tapi guna ngelai (Mat 20:28). Ngelai eme merupaken nilai-nilai luhur sini itanamken nini-nininta bas budaya kalak Karo, ija kita bas adat maka kerina pasti sada saat ngelai, eme ngelai kalimbubuna, nina kuan-kuan Karo bagi kalak si rini ku lau peganci. Ngelai eme sada dahin pengorbanen si harus i lakoken, korban waktu, perasaan, tenaga, harta bagepe banci ka nyawa (bagi Yesus) ikorbankenNa dirina i kayu salib guna nebusi dosanta.

 

Arah bahanta senda (berngi peenemken), Invocatio, ogen ras khotbah teridah maka kalak si nggo ndatken penebusen/pembebasen maka ia wajib bersyukur/ngataken bujur. Mazmur 54:8 eme Invocatio, ngingetken man banta maka pemazmur guna nggalari nazarna, alu korban sukarela, sebab enggo igejapkenna Dibata nampati ia emaka arah ia nehken nazarna ia pe radu ras nehken puji=pujin man Dibata. Bagepe arah ogenta maka umat Tuhan/Pemazmur ermeriah ukur nehken puji-pujin man Dibata, erkiteken ia enggo ibebasken ibas erbage-bage kiniseran. Emaka pemazmur ngundang kalak si erkemalangen man Dibata guna muji-muji Tuhan. “Kupuji Tuhan i tengah-tengah perpulungen si mbelin”. Radu ras ia muji-muji Tuhan maka ia mpersembahken si mehuli bahkan ia ngundang kalak musil gelah man asa besurna, janah kalak si ndarami Tuhan senang rasa lalap. Luar biasa igejapken pemazmur, Dibata bertindak bagepe nampato kerina kalak si mengandalken Tuhan Dibata ibas geluhta. Arah pemazmur enda ngingetken kita kalak si enggo tek dingen ngaloken Yesus sebagai Tuhan ras juruselamata, maka kita pe wajib nehken puji-pujin ras pengataken bujur arah kai silit bas kita.

Bagi kai si ilakoken diberu-diberu si enggo isampati Yesus mpedarat setan ras si enggo ipepalemna ibas pinakit nari. Maria magdalena pitu setan enggo ipelawesNa, Johanna, Susanna bagepe nterem diberu-diberu. Tentunda diberu-diberu enda enggo ngejapken perbahane/perkuah ate Yesus ibas kegeluhenna, emaka ia pe kerina merelaken dirina, waktuna, guna ikut ras Yesus bagi muat bagi lako ngelai arah kai silit ibas ia (erta-ertana). Arah perbahanen diberu-diberu enda maka tugas Yesus ras ajar-ajarna terus berlangsung (meritaken berita si meriah).

 

Gereja/kita kalak si enggo ngaloken keselamaten ibas Dibata nari, maka lit kewajibenta eme erberita, ersekutu ras ngelai. Kerina dahin enda eme bekas perintah Tuhan Yesus man kerina kalak si enggo tek. Laweslah, beritakenlah, peridikenlah, ajarilah, ingetlah aku ras kam seh kedungen zaman (Matius 28:19-20). Guna ndahiken dahin enda, tentuna labo banci lang harus lit telu dukungen : doa, daya ras dana. Doa merupaken sada kewajiben si banci kerina kalak Kristen ngalokenca, emaka ertoto enda la ermodal. Tua nguda, sakit sehat, bayak miskin banci ertoto. Notoken dahin-dahin tritugas Gereja gelah banci reh majuna. La banci kerina kita ikut ndalankenca guna erberita, ersekutu ras ngelai, tapi notoken banci.Arah daya pe banci kita ikut muat bagin. Si korbanken tenaganta guna ikut muat bagin ndahiken dahin tri tugas Gereja. Aminna gia lit kita si la banci ikut eme jemaat si enggo uzur ras si sakit. Tapi adi ngelai lewat dana tentuna kerina kita banci ikut muat bagin. Mungkin la seri pemere Dibata man banta, namun Dibata ngarapken man banta guna nehken tanggung jawab persembahenta. Soal mbue sitik, Dibata labo ertak-tak, sebab Dibata si mere man banta kerina.

 

Themanta eme: Ngelai Yesus alu kiniteken (persembahen ras keuangen Gereja). GBKP eme Gereja si bertumbuh seh asa gundari enggo 125 tahun berita si meriah iberitaken, emak ija ije enggo pantek Gereja Tuhan (GBKP). Hal enda kerina la terlepas arah pangilaen tri tugas Gereja sini idalanken kerina ngawan perpulungen, Namun me labo siakap banci erdalan GBKP enda adina la itopang alu dana. Kerina membutuhken dana. Janah dana enda rehna ibas kita sebagai warga si enggo ibereken Dibara arah ia masu-masu gerejaNa. Sanga kita ngawanken mbarenda lit sada pengakunta: Nggit nanggung tanggungen asa pemeteh ras gegeh, gelah erbelangna Berita si Meriah ibas GBKP enda. Arah pengakunta enda, maka kita ituntut Dibata guna nehken janjinta ndube, bagi nina Pemazmur ndai: Alu ukur meriah kupersembahken persembahen si enggo kupadanken (Mazmur 22:26). Kalak si enggo erjanji/nazar wajib nehkenca man Dibata, sebab adi la isehken maka erbual kap kita man Dibata. Kita kerina perpulungen si enggo ngaloken keselamaten ibas Dibata nari, maka kita pe harus membalas arah nehken persembahenta man Dibata arah: Kolekte, persembahen persepuluhen, persembahen pengataken bujur, kerja rani ras sidebanna.

 

Emaka sisungkun dirinta, kuga nge sedekah enda enggo silakoken ibas perpulungennta persembahen enda? Baik kolekte, perpuluhennta meningkat nge ndia? Tah ge-gel atau menurun? Kuakap kita ngenca banci metehsa. Adina 100 ribu saja perpuluhennta per bulan per kepala keluarga, janah GBKP Jakarta-Bandung enda lit 4400 KK, emaka enggo banci 440 juta/bulan ntahpe 5,28 M/tahun. Enda arah perpuluhen saja, lenga ka sidebanna. Tapi kinatana lakap setengah asa perhitungen e. Berarti jemaatta GBKP Klasis Jakarta-Bandung enda lenga lit 30% nehken perpuluhen. Emaka arah themanta sendah, mari sitingkatken persembahennta gelah arah peningkaten enda reh buena bancu sidahiken dahin-dahin gerejanta bagi enggo iprogamken.

 

Inget, labo erkiteken sitingkatken persembahenta reh musilna kita, tapi nina ibas Mazmur 37:25-26 “Mulai kin kitik-kitik nari seh bagenda enggo metua, la enggo kuidah kalak bujur itadingken Tuhan. Tah pe kempu-kempuna jadi pemindo-mindo. Pepinjamken dingen melumbar ia mere lalap, dingen anak-anakna mereken kemalemen ate man bana.” Selamat ngikuti pekan penatalayen ras marilah sitingkatken persembahenta guna kiniulin kinirajan Dibata.

Salam.
Pdt. A. Brahmana
0813 170 54961