Bimbingen Pekan Penatalayanen Wari V, Perb. Rasul 9:36-43

Invocatio :

1 Korintus 13:13
 (Dage lit telu si tetap arus idalanken, eme:erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, emeengkelengi kalak si deban)

Ogen :

I Raja-raja 17:7-16

 

Thema :

Ngelai Segedang Geluhku

 

Senina ras turang, ibas berngi sipelimaken enda kita ibabai alu thema ngelai segedang geluh. Hal enda rusur sikaitken ras Diakonia i tengah-tengah Gereja. Janah ngelai enda banci sidalanken eme erkiteken litna kekelengen ibas singelai nandangi kalak si man elai. Kalak singelai pasti lit kengasupenna baik perukuren bagepe buaten lit, kalak singaloken pelayanen eme si membutuhken ia ndatken pelayanen. Budaya kalak Karo eme situhuna ngelai, sabab kalak Karo peganci nge jadi anak beru ras kalimbubu. Adi anak beru biakna ngelai janah kalimbubu biakna i elai, tapi sada-sada paksa pasti si nai kalimbubu ia pe banci ka nge ngelai. Emaka nina Rasul Paulus ibas I Kor 13:13, sipentingna kal eme engkelengi kalak sideban, berarti membuktikken ateta keleng nandangi kalak sideban eme ija kita nggit ipake jadi pelayan/ngelai kalak.

 

Senina ras turang, bangsa Israel enggo ngenanami kelegon, emaka lau enggo kerah janah siman pangan pe enggo keri. Termasuk pe Nabi Elisa enggo membutuhken pangan ras lau inemen, emaka ia hanya berharap nandangi kuasa ras perbahanen Dibata saja. Kujape turiken enggo seri, ijah ije enggo lanai lit siman panganen. Tapi ibas sienda Dibata mereken sada pengarapen man Elisa guna lawes ku Sarpat deher Sidon. Daerah enda enggo idarat wilayah negara Israel, tapi Tuhan nuruh ia ku je, isuruhna jumpai sada tua-tua mbalu guna mere ia man. Arah perintah Tuhan enda man Nabi, lit telu hal eme:

1. Arah ia njumpai tua-tua mbalu enda ia pe banci man ras minem.
2. Arah sie banci ka teridah kuasa Dibata nandai tua-tua enda, gelah la ia kekurangen kebutuhen nggeluh.
3. Arah enda pe teridah pelayanen ngelai pekepar antara Elisa ras tua-tua mbalu e.

Situhuna adi secara manusia, Elisa pe bagi simberat kapna mindo roti, bagepe diberu e mberat nge akapna mereken roti si sitik e, sebab ia pe mate nge kenca enggo man. Tapi si idah maka baik Elisa bagepe Diberu e duana ia tetapi mengandalken Tuhan Dibata.(ngalo diberu e “Ibas gelar Tuhan dibatandu si nggeluh. Ola kam mbiar, nina Elisa, sebab bage nina Tuhan Dibata Israel, Tepung bas mangkok la keri-keri. Minak pe bas botol la kurang-kurang seh ku pe susur udan (ayat 12-14). Baik pengakun diberu kalak Sarpat bage perkataan nabi Elisa, tetap Tuhan iandalkenna. Emaka duana ia tersamnpat, Elisa pe banci ndatken oangan, diberu mbalu ras anakna pe terus-menerus dat pangan seh dibata pe susur udan ku doni.

 

Senina ras turang, ngelai eme alu ukur meriah la egois, janah ngelai pe alu dem tanggung jawab dingen ngandalken/ngutamaken Dibata maka Ia masu-masu kegeluhen singelai bagepe si man elai e. Emaka ngelai lah kita segedang geluh bagi diberu si i Sarpat ndai.Bagepe si idah ibas Perbahanen Rasul, ija sekalak diberu si enggo tek gelarna eme Tabita/Dorkas. Dorkas enda sekalak si luar biasa perbahanenna nandangi kalak musil, ija melala kal ia nampati (ayat 36). Ternyata mehuli pe perbahanen, nampati pe melala, sakit kamh janah seh pe mate. Arah kematenna enda enterem kal kalak si merasa kehilangen erkiteken perbahenna si mehuli, terutama eme kalak si enggo mbalu, tangis ia dingen ngkelilingi mayat Dorkas. Icidahkenna uis ras baju si ibahan Tabita man Petrus si enggo hadir ibas rumah duka. Sungguh luar biasa perbahanen Tabita sanga ia nggeluh, melala kalak ndaken perkuah atena.

Erkiteken bage belinna perbahanen Tabita sangana ia nggeluh, emaka Petrus si enggo hadir ncidahken kuasa Dibata, erjimpuh ras ertoto Petrus, emaka nina : O Tabita kekenlah. Emaka Tabita pe medak janah meriah kal ukur kalak si lit ije, terutama kalak si enggo ngaloken pelayanen ibas Tabita nari.

Senina ras turang, arah kejadin enda maka mbar beritana ku belang-belang Jope. Tabita si ngelai alu meriah ukur, labo pernah berpikir maka arah perbahanenna ia ngelai sada paksa pagi adi enggo mate nggeluh mulihken. Tapi enggo kin biakna biak singeal sedekah nggeluh, emaka seh mate pe ia tetap ngelai, arag perbahanenna man kalak musil i Jope, terutama kalak si enggo mbalu, maka Dibata tetap ngidah kai sini ibahanna. Emaka Dibata mereken keriahen man bana bage pe man kalak si deban janah gelar Dibata ermulia.

 

Man banta/Gereja harus terus-menerus ngelai. Tiada kata tanpa melayani. Emaka ibas ndalani tahun 2016 enda mari radu ras kita (Pdt,Pt/Dkn, pengurus kategorial,jemaat rsd) ngelailah kita, gelah tersehei harapen Gerejanta, alu tahun pelayanen :Meningkatkan Komitmen Warga GBKP yang Missioner untuk Berpartisipasi dalam Pelayanan. Selamat erpekan penatalayanan ibas awal tahun 2016. Dibata si masu-masu GBKP.

 

Salam
Pdt. A. Brahmana
081317054961