Bimbingen Pekan Penatalayanen Wari III, Perb. Rasul 2:43-47

Invocatio :

Andiko ulina ras senangna adi kalak si ersenina ersada
perarih, Mas.133:1

Ogen :

Johanes, 17:20-23

Tema :

Kerinana Guna Kerinana (Semua untuk semua).

 

Bena Kata.
Sikataken bujur man Tuhan, enggo seh kita kubas wari sipeteluken ibas Kebaktin pekan penatalayanen GBKP Tahun 2016. Tema bahan pekan-ta wari/berngi enda eme: Kerinana Guna Kerinana (Semua untuk semua), erti tema-ta enda eme  kiniersadaan. Kiniersadaan eme sada ciri-ciri kegeluhen kalak sienggo ngaloken Kristus. Kiniersadaan e banci ilakoken adi kerina bagin nggejabken

 

Bimbingen Khotbah.
Judul perikope Yohanes 17, eme Jesus Ertoto kerna ajar-ajarNa, termasuk man kerina kalak sierkiniteken man Tuhan Yesus, lit piga-piga topik pertoton Tuhan Yesus ibas perikope enda eme:

• Segelah Ajar-ajar tetap ikep-kep Dibata.
• Segelah Ajar-ajar tetap ipebadiaken Tuhan
• Segelah ajar-ajar tetap ersada bagi kiniersadaan Yesus Kristus ras Dibata
• Segelah arah kegeluhen Ajar-ajar gelar Dibata ipermuliaken.

Ogenta ibas Johanes, 17:20-23, eme Pertoton Tuhan Yesus Kristus segelah ajar-ajarNa ras kalak sierkiniteken tetap nggeluh ibas kiniersadaan, sope Yesus Kristus ngalaken kiniseran, mate ikayu persilang ras nangkih ku sorga. Yesus Kristus ertoto segelah ajar-ajarNa selaku perberita  Simeriah tetap ersada ukurna sada pengidahna kerna Injil. Arah kiniersadaan ajar-ajar ras perpulungen si tek e  berita simeriah e reh mbarna iberitaken. Arah ogen enda sieteh maka kiniersadaan e seh kal perlu ras penting icidahken kalak Kristen.

 

Kitab Perbahanen Rasul-rasul.2:43-47, konteks renungan khotbah enda eme kenca nusurNa Kesah siBadia, Ajar-ajar Tuhan Yesus meritaken Berita Simeriah kerna Yesus Kristus man jelma sinterem, melala tanda-tanda sengget sinilakoken ajar-ajar erkiteken kuasa Kesah siBadia, emaka entereml kalak iperidiken ras ngakuken Yesus Kristus eme Tuhan ras Juruselamatna, emaka iajuk rasul-rasul e segelah perpulungen sienggo iperidiken nggeluh sikeleng-kelengen bagi si ersenina. Cara nggeluh kalak si erkiniteken e eme :

1. Kalak si erkiniteken tetap pulung ras-ras, janah la erbana-bana tapi mediate sada ras sidebanna, mperdiateken keperlun sapih-sapih perpulungen.  Ndayaken erta-ertana janah duitna ibagiken sue ras keperlun sekalak-sekalak. Enda me kegeluhen  perpulungen si ngena ate Tuhan Dibata, la ngena ate Tuhan adi perpulungen nggeluh guna ngukurken dirina saja-sementara enterem senina-senina si sada perpulungen nggeluh ibas kekurangen. Tapi iajuk segelah kita nggeluh bagi siersenina sada perarih (Bdk. Introitus).
2. Ersada arih pulung ersembah ibas rumah pertoton guna ersembah ras mpermuliken Tuhan Dibata. Ersembah man Dibata jadi sada kerincuhen ate perpulungen si tek man Tuhan, bagi sienggo isehken pemasmur, ia tetap ertedeh ate guna reh ku rumah pertoton guna muji mpermuliaken Dibata.
3. Ngena ate kalak sienterem ngidah perbahanen perpulungen e, janah tep-tep wari itambahi Tuhan beligan kalak si iselamatken. Kegeluhen perpulungen si erkiniteken teridah arah kerina dampar kegeluhen, cara  rukur, cara ngerana, bagepe lagu-langkahna, ngena ate kalak natap-natapsa ras pe jadi teladan ibas kegeluhen.

Refleksi.

1. Salah sada dampak negatif perkembangen zaman enda eme, masyarakat lebih individualis, ngukurken diri sendiri, secara individu lanai meriah nggeluh ras keluarga,  engkai... erkiteken melala persaingan-persaingan sada ras sidebanna seh maka lanai lit waktu guna persekutuan/ibadah. Enda me sada tantangen si harus ialaken warga jemaat ta, emaka ibas Pekan Kebaktin Penatalayanen enda iajuk kita segelah tetap menyadari kerna keberadaanta selaku kalak Kristen, kita labo nggeluh guna dirinta sendiri tapi kita harus jadi pasu-pasu man kalak sideban. Enterem kalak ibas lingkungenta si ngenanami kiniseran, subuk kalak Kristen bagepe la kalak Kristen kita harus mediate guna nampati ia ras mpenahangi perbebenna, bdk. Gal.6:2.
2. Yesus Kristus enggo ertoto man kerina Ajar-ajar bagepe kalak sierkiniteken, kita pe selaku kalak sierkiniteken tetap notoken perdalanen berita Simeriah ras jadi perberita simeriah arah lagu-langkah perbahanenta, segelah gelar Tuhan ipermuliaken.

Pdt. Togu P.Munthe
GBKP Rg. Cililitan