Bimbingen Pekan Penatalayanen Wari II, Ketangkasen 2:1-7

Invocatio :

Kalak si megombang dingen meganjang rukur nggit
mandangi dingen jago akapna bana” (Kuan-kuanen 21: 24)

Ogen :

Jesaya 1: 21-23

Khotbah:

Ketangkasen 2: 1-7

Tema :

Lanai Atendu Keleng Bagi Sigel-gel

 

 

Kitab ketangkasen (Ind: Wahyu) sering ianggap sebagai kitab ramalan kerna kedungen zaman. Pengertin secara harfiah ketangkasen/wahyu eme penyingkapen, penyataan. Enda labo ertina ramalan bagi ramalan masa depan si populer ibas zaman gundari. Ketangkasen enda eme salah sada kitab nubuat. Nubuat eme melihat masa depan dengan mata iman, berdasarkan pengalaman dengan Allah.  Isi kitab enda jadi pergegeh ibas situasi perpulungen i Asia Kitik, si paksana itindas penguasa Kaisar Romawi si menuntut dirina ipuja dingen isembah, adi nembah Tuhan lit ukumen bahkan penganiayaan. Ije perpulungen ibere penghiburen gelah tetap erpengarapen man Tuhan dingen megegeh bas kinitekenna.

 

Bagin khotbah Ket 2: 1-7 eme sada pesan kerna perpulungen Epesus maka Dibata ngidah kerinana. Situhuna perpulungen Epesus tutus ibas ndarami kebenaren. Lit piga-piga keunggulenna siidah Dibata eme:

1. Tutus erdahin
2. Saber
3. La atena bage kalak si jahat
4. Nggit nguji rasul palsu seh terbukti ia perguak (ibas si e teridah maka kalak Epesus enda mediate, la masa bodoh kerna litna pengajaren si la payo arah pengajar palsu)
5. Megenggeng dingen la surut perban kiniseran.

Tapi enda la erbahan perpulungen e benar dingen sempurna i lebe-lebe Dibata. Lit pandangen, sada ngenca, tapi fatal, eme: lanai atena keleng Dibata bagi tangtangna nai. Enggo urak kekelengen e. Iakui Dibata nge kelebihen-kelebihen kalak Epesus tapi sada pandangen e erbanca Dibata ngerana: Ingetlah uga dauhna kam enggo ndabuh! Jeralah kam! Arah si e banci isimpulken bahwa: perbahanen si mehuli la menjamin  ngena ate Tuhan adi la idasari keleng ate si tuhu-tuhu. Kai pe sinibahan kita harus erpalasken keleng ateta man Dibata. Enda si enggo mulai pudar ibas perpulungen Epesus nari. Lanai tena keleng Dibata bagi si gel-gel. Dibata metehsa sebab IA ngidah pusuh tep-tep manusia. Genduari sisungkun lebe dirita sekalak-sekalak, keleng ateta Dibata? Apai ke belinen kekelengen e genduari ntah nai tangtangna kita nandai IA? Adi belinen genduari, puji Tuhan! Sijaga lah e gelah tambah warina tambah kelengna ateta Dibata, labo reh urakna. Ula sempat man banta seh teguran Dibata bagi tegurenNa man kalak Epesus.

 

Kekelengen min jadi palas ibas kerina perbahanenta si mehuli. Persinget enda ipeseh man banta erkiteken mbue jelma si muat keputusen lanai erpalasken kekelengen, tapi kepentingen pribadina. Orangtua merawa man anak labo gelah ngajari anak e jadi lebih mehuli tapi hanya terjeng encidahken superioritasna selaku orang tua. Arah pengidah manusia, seri kerina. Tapi Dibata ngidah pusuhta. Kekelengen e min pebelin ibas pusuhta. Kekelengen e min pebelin ibas jabuta. Lit sada ilustrasi. Ibas sada paksa lit Moria mulih ia belanja idapetina i lebe rumahna lit 3 kalak si la tandaisa. Ban mekuah atena nina man 3 kalak ndai: “La kam kutandai, tapi kuidah mehuli nge kam teluna. Mari kurumahken gelah man kam.” Nina salah sada kalak ndai: “Nggo kin rumah perbulangenndu?”. “Lenga, bas dalan denga ia. Aku ras anakku ngenca rumah.” Reh nina ngaloi: “Adi lenga ia rumah, kami la nggit masuk. Timai kami saja jenda.” Singkat cerita mulih me Mamre  tengah jabu tapi la arah ingan si telu kalak ndai nimai e maka lenga idahna. Ituriken Moria ndai me kerna si e, nggo ka sikap kerina pangan. Emaka isuruh Mamre ndai ia ngundang tamu ndai ku rumah. Tapi nina 3 kalak ndai man Moria, “Kami la banci radu bengket ku rumahndu. Sekalak ngenca banci. Temanku si ah gelarna Kinibayaken, temanku si e gelarna Kesuksesen, adi gelarku Kekelengen. Sungkunlah perbulangenndu, ise tena undangna kubas.” Nina Mamre: “Adi bage suruh masuk Kinibayaken. Ateku gelah rumahta enda dem alu kinibayaken.” Moria ndai la ka setuju, nina: “Kesuksesan saja siundang Pak, gelah mbue hasil panenta, sukses ka kerina usahanta.” Ertimbang denga ia duana, reh anakna mereken usul, “Pak, Mak, la kin madin Kekelengen siundang masuk ku rumahta? Pasti malem kel ateta adi rumahta idemi kekelengen.” Mamre ras Moria ndai setuju nandangi pilihen anakna, emaka teluna ia ndarat, ilebuhna me si tergelar Kekelengen ndai, iundangna masuk. La isangka-sangka, tedis teluna tamu ndai, masuk ka pe ia teluna ku rumah. Nina Moria ndai: “Kekelengen kap si iundang kami ndai, ngkai maka ikut kam duana?” Reh kalak ndai ngaloi: “Adi Kinibayaken ngenca iundangndu, Kesuksesan ras Kekelengen la banci ikut. Bage ka pe adi Kesuksesan iundangndu. Tapi adi Kekelengen iundangndu, Kinibayaken ras Kesuksesan pe ikut. Sebab Kinibayaken ras Kesuksesan enda buta kap, Kekelengen ngenca sierpengidah, emaka ikut-ikut kami ia katawari pe gelah tetap kami ibas dalan si mehuli.”

 

Ibas Ket 2: 6 Tuhan ngidah kiniulin perpulungen e, la tena ngena si la ngena ate Tuhan. Kalak Nikola enda mungkin ipanna pangan si jadi persembahen man berhala bagepe ikut ia ibas upacara penyembahen berhala e. Perpulungen Epesus la nggit berkompromi erkiteken ietehna si iban kalak Nikola enggo pasti la ngena ate Dibata. Bage me kita selaku kalak si erkiniteken. Pang kita mengambil sikap. Adi enggo si teh la ngena ate Tuhan, ula ka min e ateta ngena. Zaman enda mbue pinakit sosial (bdk ogen); judi, korupsi, suap dan sogok, penipuan, Narkoba, ula kita nggit berkompromi, apakah kita membiarkan orang yang kita kenal melakukannya atau bahkan kita menjadi pelakunya. Adi enggo si teh e la ngena ate Dibata, ula lakoken. Lebih asa si e, ula sinikken adi si teh lit biak si bage i lingkungenta. Lakoken kai si banci ilakoken kita, kerina e palasna sada ngenca: keleng ateta Dibata. Adi keleng ateta Dibata, siikutken pedah-pedahNa (Joh 14:15).

 

Cl. Pdt. Yohana Br Ginting
GBKP Rg. Cibubur