Suplemen Bimbingen Khotbah Pekan Doa Wari VII, Tgl. 23 Mei 2015

Ogen :  1 Petrus 2:9-10; Renungen : 1 Korinti 3:8-9

Thema  : "Ertoto Guna Aron Dibata"

Kata Penaruh

Pekan doanta wari pe pituken enda, e me pekan doa si terakhir. Ibas wari si terakhir enda enggo min si idah tanggung jawabta ibas ertoto; Arah ertoto si idah min pengelebuh ras pengutusen Dibata, arah ertoto e isadarken ras sialoken min gegeh guna dalanken tanggung jawabta ndukung pelayan pelayan khusus ras pelayanenna. Arapen gerejanta GBKP, lit min ulihna pekan doanta tahun enda maka arah nggitna kita ertoto tambah teridahna ketutusen ras kinitekenta.

Persolen si melatar belakangi teks

Rasul Paulus ngataken maka perpulungen Korinti nggeluh ngikutken peraten "daging", ngena denga atena erselisih paham ras ertentangen ras temanna sada perpulungen. Kedagingen si imaksud Rasul Paulus e me perbahanen perpulungen si mpedauh dirina ras temanna manusia, berarti mpedauh dirina ras Dibata. Peraten daging nuduhken kiniteken si meteruk, erkuasa ibas perukuren ras pengertin perpulungen Korinti. Perayakenna e me kepentingen kelompok si ngena iakapna. Lit si ngatakenca maka ia kelompok Paulus, lit si ngatakenca maka ia kelompok Apolos, tentuna alu si e tejadi perselisihen ras la ngergaken kalak si deban, rukur erbana bana, arusna kalak si keleng atena Dibata keleng pe atena temanna manusia, maka labo dalih ise pe man bana "ipertemanina". Kai si ilakoken perpulungen e perbahanen si sia sia kap, nuduhken kinitekenna si "la turah".

Pembahasen

Si erselisih ibas perpulungen Korinti e me perpulungen, antara Paulus ras Apolos sebage si erdahin Tuhan labo lit perselisihena, duana si erdahin Tuhan e sada aron Dibata kap, si masing masing enggo ndahiken tanggung jawab pelayanenna, bagi nina Rasul Paulus "Aku nuansa, Apolos si niramsa tapi si penting Dibata kap si peturahsa." Umpamana kalak perjuma, aron si menaken dahin e alu nikapken juma ras nuansa seri kap ia pentingna ras aron si ngerawatsa, ia jadi sada tim. Tiap-tiap si erdahin e ia erdahin guna Dibata kap, emaka ihamatina min Dibata si mada juma e, tutus dingen keleng min atena perpulungen e.

Paulus ras Apolos seri kap pendahinna, sada aron Dibata (kawan sekerja Allah) si radu ras ndahiken dahin Tuhan ras ia erdahin ras Tuhan. Rasul Paulus pe ngingetken maka tiap tiap aron e ialokenna me upahna ibas Tuan nari rikutken pendahinna sekalak sekalak bagi pertimbangen Tuan e.

Kalak si atena jadi aron Dibata si tutus arus lebe idaramina ras jumpa ia ras Dibata. Dalanna ia banci jumpa ras Dibata e me arah pertoton ras ende enden pujin man Dibata, ije me Dibata reh njumpai ia. Adi enggo i jumpai Dibata, bengket min ia ku bas pengelebuhNa e, dahikenna min alu tutus ras i jagana pengelebuhNa e alu tutus ertoto, ngendeken ende enden pujin ras ibadah.

Guna kemajun ras ketahanen aron Dibata ibas ndahiken dahina, penting kap dukungen toto perpulungen ras keluarga, bagi si ilakoken ras iakui Paulus dalanna ia ngasup ras setia ibas pelayanen Tuhan e me salah sadana erkiteken dukungen perpulungen Korinti "Kam pe isampatindu ka kami alu pertoton. Alu bage, erkiteken enterem kalak ertoto guna kami, enterem ka pe kalak si ngataken bujur erkiteken kami, sabab Dibata enggo encidahken lias ateNa man kami” (2 Korinti 1:11) baca pe Epesus 6:19-20, Kolose 4:3,4, 1 Tesalonoka 5:25, 2 Tesalonika 3:1 ras sidebanna.

Si setia ndahi Tuhan ibas pertoton ras ngendeken ende enden pujin man Dibata maka ibahan Dibata me ia sikap ndahiken pelayanenenNa aminna kuja pe ia iutus, Dibata mere gegeh ndahikennca. Bageme rahasia keuntungen aron si tutus ertoto ras muji muji Dibata, erkiteken perbahanenna e ialokenna me kuasa bagepe ndatken gegeh Tuhan ia erkiteken dukungen toto perpulungen ras keluargana.

Gejapkenlah ibas pemilihen ras pengutusen jadi aron Dibata, labo ipilihna ras iutusNa kalak si ngasup, luar biasa ras istimewa tapi si ipilihNa e ibereNa me gegeh ras kengasupen, iperlengkapiNa. Tuhan megati milih aronNa guna ndahiken dahin si lebih asa kengasupen si ipilihNa e, tujunNa gelahna kalak si ipilihNa e mengandalken Tuhan. Emaka si ipilih Tuhan arus min meteruk ukurna, lalap iperkuakenna Tuhan arah pertotonna, gelah ialokenna penampat ibas Tuhan nari. Erpenalemen min ia man Dibata ras mbuka diri nandangi kebersaman pelayan, sabab ibas kebersaman aron Dibata e gegeh Dibata terbukti. Kalak si ipilih Dibta labo isia sia ken Dibata, tapi ijadikenNa jadi aronNa (rekan sekerjaNya) guna rencana rencanaNa. IperlengkapiNa sebab Dibata si ndilo aronNa e setia kap (bandingken 1 Tesalonika 5:24). Man kalak si ipihNa ibereken Dibata Kesah si Badia guna kesaksin ras kiniersadan aronNa (bandingken Perbahaen Rasul-rasul 2).

Pengutusen

Ula mbiar jadi aron Dibata, sebab Yesus si enggo milih kita jadi aronNa Ia kap si mada dahin e ndukung kita ibas pertotonNa man Dibata "Ertoto Aku man banNdu kerna ia. ..., ertoto aku kerna kalak si enggo iendeskenNdu man bangKu, sabab sikerajangenNdu kap Ia. ...kemulianKu teridah arah ia kerina. O Bapa si Badia, kepkep ia alu kuasaNdu, kuasa si iberekenNdu man bangKu, gelah ersada ia bagi Kam ersada ras Aku. Labo Kupindo gelah ipedarat ia ibas doni enda nari, tapi Kupindoken man baNdu gelah ikawaliNdu ia ibas si jahat nari. Bagi Aku labo sikerajangen doni enda, bagepe ia labo sikerajangen doni. Serapken ia man gunaNdu arah kebenaren. Serapkenlah ia man gunaNdu; kataNdu kap kebenaren. Enggo Ku suruh ia ku doni enda. Kuendesken diringKu baNdu guna ia, gelah ia pe iserapkenNdu man gunaNdu arah kebenaren (Johanes 17:9-11, 15-19).

Guna jadi aron Dibata kita enggo iserapkenNa, bagi nina ibas invocatio ibas wari si pepituken enda nina "E maka sipergunakenlah kengasupenta si pelain-lain e si enggo ibereken Dibata man banta rikutken lias ateNa" (Roma 12:6a). Si tandai min kengasupenta si pelain lain e, sidahiken sebage bukti kita enggo ipilih ras iperlengkapi jadi aron Dibata. Bagi pengogenta ibas 1 Petrus 2:9-10; kita labo nari si gelgel e, kita enggo ipelimbarui Dibata guna jadi aronNa guna mberitaken berita si meriah. Kesehaten, kesempaten, sukses nggeluh ras kai si lit ibas kita labo e si ngangataken kegeluhenta jadi mulia. Si erbahanca kita dame sejahtera ras mulia adi si gejapken kekelengen Dibata si mbelin ras si dahiken kekelengenNa e.

Pdt. Ekwin W Ginting, sitelusada-bekasi