Suplemen Bimbingen Khotbah Pekan Doa Wari II Tgl. 18 Mei 2015
Ertoto alu tujun si sue ras peraten Dibata pada hakekatna igelari ertoto ibas gelar Tuhan Yesus. Kai kin simenjadi palas ibas tujun pertotonta e ?. Dibata enggo nehken kekelengenNa man manusia arah kematen anakNa ku doni guna keselamatan man manusia ras kerina isi doni enda. Jadi persembahen si merimna. Sie kerina erkite kiteken Perkuah ate Na ibas nehken keleng ateNa man manusia. Alu bage maka manusia pe sebagai anak si enggo ngaloken Kekelengen e, maka ia pe arus nggeluh erpalasken keleng ate Kristus e. Kalak kristen arus nggeluh erpalasken kekelengen sue ras invocatiota.
Ibas ogenta ituriken kerna perentah Dibata man bangsa israel guna mperdiateken kegeluhen kalak pertandang, anak melumang, bage pe diberu balu balu. Perentah Dibata e lit 2 tujunna:
(1) Gelah bangsa e ula ngerampas kai si menjadi hak man kalak pertandang, anak melumang ras diberu balu balu (17-18). Sebab Dibata enggo nehken kekelengenNa man bangsa e sanga bangsa e jadi budak i Mesir. Dibata mbebasken bangsa e, erpalasken sie maka bangsa e la berhak guna ngerampas tapi pe arus nehken kai simenjadi hakna ras ngkelengisa.
(2) Gelah bangsa enda mereken penampat man kalak pertandang, anak melumang ras diberu balu - balu (19-22), la banci bangsa enda sinik saja, kai si lit ibas bangsa enda kerina arus lit ka bagin man sikerajangen kalak pertandang, anak melumang, ras diberu balu balu. Sebab Dibata nehken prinsip solidaritas, alu ngingetken kerna bangsa israel sanga ia i Mesir jadi budak (18,22) nggeluh alu tertindas, tapi Dibata tetap mpekena kena bangsa enda ras Dibata mbebasken bangsa enda alu keleng ateNa, berdasarken si e ka me ate Dibata gelah bangsa enda pe nampati ras mperdiateken kegeluhen kalak pertandang, anak melumang, ras diberu balu balu. Enda me perentah Dibata man bangsa israel.
Job tuhu tuhu jadi teladan man kerina kalak bas paksa sie. Amin pe job bas kiniseran, tapi job ngasup tetap mperdiateken kalak si musil desken bapana, bagepe si lit bas perbeben. Kalak tertindas, anak melumang ras diberu balu - balu. Job nggeluh ibas standar kebenaren ras keadilen. Job menghadirken jawaben Dibata guna kebutuhen kalak sindarami penampat Dibata. Karakteristik job maba dampak ras perubahen man kegeluhen kalak si lemah ras musil.
Temata bas pekan doa wari peduaken enda ertoto guna nggeluh sepenggejapen ibas perpulungen. Nggeluh sepenggejapen ibas perpulungen ertina litna keleng ate sapih sapih manusia, keleng ate alu tindak nyata alu la rayo ayo. Sebab Kristus enggo jadi persembehen si merimna guna engkelengi manusia. Alu bage maka la banci lang kita arus ermediate nandangi sekitar geluhta subuk bas pendahin, bas perpulungenta, inganta tading bagepe tupung ija pe kita. Adi sinik kita berarti sitahan keleng ate siarus sisehken man kalak si perlu penampat bas kita nari. Searusna perbeben sinanamina jadi bagin ibas kita guna nehken penampat, mereken solusi, mereken penghiburen man bana. Bagi perentah Dibata man bangsa Israel.
Nehken keleng ate tentu labo kenca bayak tah pe erjabaten kita, tapi ibas situasi lit perbeben sekali pe kita ipake guna nehken keleng ate bagi job bas geluhna. Alu bage tujun pertotonta e nyata silakoken.
Pdt. Nurelli br Tarigan
