Khotbah Lukas 22:14-20, Pekan Penatalayanen Wari VII, Sabtu 24 Januari 2015
Teks : Lukas 22 : 14-20
Thema : Persadanta Ras Yesus Erbahan Kita Megegeh
Peristiwa penyaliban Yesus (KematenNa) enggo ndeher emaka Yesus ras ajar-ajarNa erbahan sada persekutuan guna ercakap-cakap siterakhir antara guru ras muridNa. Emaka melala hal sini bahan Yesus nandangi murid-muridNa diantarana eme erbahan lakon persadan Sibadia, eme man roti si latama ragi radu ras minem anggur. Hal enda biasange i lakoken sekalak rabi ras ajar-ajarNa apaika nandangi peranyan Paskah kalak Jahudi. Tetapi kai sini ikataken Yesusibas ayat 15“merincuhkal Aku ngerayaken Paskah ras kam ope denga Aku ngenanami kiniseran”. Hal enda mengingatken mulihi kerna kini seran sinandangi i aloken Yesusibas penguasa nari. Ngerayaken Paskah eme man ras minem, sekaligus ncidahken kini ersadanna sapih-sapih ia, namun sekali enda lain dari pada yang lain. Sebab sewaktu Yesus muat roti i cepik-cepikNa iberekenNa man ajar-ajarNa alu ngataken: enda me daging ku si ibereken man gunandu, bahanlah bagenda guna peringet-ingeten man bangku, i lanjutkenNa muat calung; arah calung enda Dibataerbahan padan simbaru si isehken alu darehku si mambur man gunandu. (ay 19-20).
Senina ras turang i tengah-tengah gerejanta GBKP, lakon persadan si Badia i lakoken 4 kali sada tahun. (Pekan Penatalayanen, Jumat Simbelin, Pekan Doa, Pekan Keluarga). Tentuna ngingetken kai si perintah ken Yesus man murid-muridNa ope denga Ia nadingken doni enda. Arah kai sini ibahan Yesus enda nehken sada pesan man murid-murid/Gereja gelah tetap ngelakoken bagi kai si ilakoken Yesusope denga Ia i endesken man penguasa. Sebab arah kai sini ilakokenNa e ncidahken man gereja eme:
- Nginget pengorbanen Yesus arah kayu salib, Ia ngamburken darehNa ras dagingNa pe ilukai/tercabik-cabik. Janah pengorbanenna eme pengorbahen Geraja guna nehken berita keselamaten man doni enda.
- Ngingetken man Gereja maka lit sada persekutuan si harmonis sada ras sidebanna guna peteguh perpulungen ni Kristus bas doni enda.
- Ngingetken maka Gereja membagiken simeherga nandangi sesama manusia (kekelengen Tuhanras kai silit bas kita).Gelah kai sini gejabken kita banci ka min i gejapken kalak sideban.
- Arah kai sini ilakoken Yesus pe sekaligus ngingetken gelah persadan sapih-sapih kita, sapih-sapih Gereja pe reh terguhna, gelah lalit perpecahen, sebab kita kerina bagian roti/dagingNa si enggo i cepik-cepik e. Ras dareh/anggur si enggo i bagi-bagiken e. Persadan ras Yesus erbahan kita megegeh eme Thema berngi si pepituken pekan penatalayanen ta ibas tahun enda. Hal enda ngingetken man banta kuga kin Tuhan Yesus terus menerus membina kini ersadanNa ras ajar-ajarNa, janah ikatekenNa pe maka bagi bapa ersada ras ia, bagepe ajar-ajarNa/Gereja peersada ras ia (Yoh 17 : 21). Bagepe i kataken Yesus maka kini ersadan Yesus ras perpulungen bagi persadan batang ras dahan, adi lakin ersada ras batange labo ngasup erbahan kai pe /erbuah Yoh 15: 4.
Kini ersada ras Kristus pe ngingetken manbanta maka kita pe harus ersada ras sesama anak-anak Tuhan, sebab arah kini ersadanta e me maka kita megegeh bagi pepatah melayu: Bersatu kita teguh, bercerai kita runtuh. Kini ersadan enda me mahanca Gereja Tuhan terbangun i doni enda. Emaka ibas kita ersada ras Tuhan, kita pe menjalin hubungen kebersamaan ras sesamakita anak-anak Tuhan bagepe sesama manusia. Tahun 2015 emda lit 2 agenda Gerejanta GBKP simbelin eme sidang Synode ras Jubelium 125 tahun Injil/ BSM bengket ku kalak karo. Arah dahinenda maka peran sertanta sebagai jemaat sangat i butuhken arah kini ersadanta. Sada totonta, sada pengarapenta eme gelah kerina dahin enda sukses ras i pasu-pasu Dibata. Gelah Gerajanta semakin maju i tingkat lokal, nasional bagepe internasioal.
Senina rasturang, arah lakon persadan Sibadia sini ilakoken Yesus man ajar-ajarNa eme ingetken man banta maka : calung eme Dibata erbahan Padan simbaru, eme Ia ningetken tentang korban kematenNa (band Mat 26:28; I Kor 11: 25), emaka arah kematenNa me ngesahken kai si enggo i padanken kerna kerehenNa guna nelamatken doni enda. DarehNa sienggo mambur man gunanta eme kerna berita pengalemi dosa, sebab arah darehNa si enggo iamburken e dosa-dosa doni enda enggo ibersihken. Emaka arah pekan penatalayenta ibas berngi si enda mabai kita gelah reh semangatna ndalanken tanggung jawabta selaku kalak Kristen si enggo i bersihken dosa alu darehNa e meningkatken persekutuanta i tengah-tengah jemaat, bagepe pelayanenta nandangi kalak sideban, gelah arah e gelar Dibata ermulia, bagepe reh teremna kalak ngaloken Kristus i tengah-tengah donienda.
Senina ras turang ibas themanta ndai lit 2 kata si harus penekanen man banta eme kata Persadanta, Megegen. Kalak karo lengape nai jadi pengikut Kristus persadan enda enggo i lakokenna, ibas hal-hal si mberat, ersada arihna guna ndungi, umpamana : mbangun rumah si waluh jabu, ersada arihna ngerintak kayu i kerangen nari ku kuta, kugape galangna kayu e pasti seh ikuta janah rumah e pe dung ibangun. Bagepe bas karo lit budaya gugu, misalna adi lit keluarga/anak kuta mesera baban geluhna mis i persadana arihna guna nampatisa gelah beban/ kini seran keharga/anak kuta e terselesaiken. Bagepe kata megegeh kai pe adi ras-ras ken bas kalak karo lampas dung dingen hasilna pe mehuli, misalna budaya raron/aron : ija adi sisada kita ndahiken dahin e selama waluh wari beda hasilna ras waluh kalak idahiken sada wari. Emaka bas nini-ninita nai kini ersadan mahanca Ia megegeh ibas ndungi/ ndahiken sada-sada dahin persoalen. Gundari kita enggo jadi pengikut Kristus sini ikataken kalak Kristen emaka budaya sini terapken Yesus eme kini ersadan, ersada ras Kristus ersada ras perpulungen, pasti arah kini ersadan ras Kristus bage ras perpulungen pasti kita megegeh. Emaka kini ersadanras ipajekken i tengah-tengah keberadaan kalka karo si berbudaya kini ersadan ras Kristus Yesus la i ukur arahpangkat, jabatan, kebayakenbagepe hubungen perkade-kaden, tapi i ukur arah keleng atenandangi Tuhan Yesus bagepe nandangi sesama manusia. Yesus empersadaken murid-muridNa arah perjamuan siterakhir ope denga Ia nandingken doni enda, aminna gia ia nandangi sirang tapi arah e teridah kekuatan gereja seh asa gundari GBKP si ipajekken i tengah-tengah keberadan kalak karo si berbudaya kini ersadan, emaka ula kari hebaten budaya asangken persadan perpulungen, tapi mari si rakut persadanta sapih-sapih kita maka sini iarapken Tuhan Yesus bagepe pendiri gerejanta enada banci terwujud kita sebagai Sira ras Terang doni enda.
Pdt. Andarias Brahmana S.Th
GBKP Pondok Gede
081317054961
