Khotbah Imamat 25:8-17, Pekan Penatalayanen Wari VI, Jumat 23 Januari 2015

Invocatio :
Endekenlah ende-enden simbaru man baNa,alu mejile,kuitlah
kulcapijanah ersuraklak meriah (masmur 33:3)

Ogen : Perbahanen Rasul 15:1-11; Khotbah : Imamat 25:8-17

Tema : Ermeriah ukurlah ibas tahun Jobel

A.Perlebe
Tahun Jobel eme salah sada perayaan keagamaan si lit ibas tradisi kalak Jahudi.Secara sederhana tahun Jobel enda eme itandai sebagai tahun pelimapuluhken (7 X 7 =49...emaka tahun berikutna eme 50..si igelari tahun Jobel).Ibas tradisi kalak Jahudi tahun Jobel enda irayaken radu ras hari raya perdamaian.Perayaan tahun Jobel enda ibuka alu ngembus tanduk (sangkakala),alu cara enda la saja jadi tanda maka perayaan tahun Jobel ibenaken tapi enda sekaligus momo ku kerina negeri kerna kebebasen man kerina penduduk,khususna kalak si enggo idayaken jadi budak i ulihken ku keluargana.Momo kerna tahun Jobel enda la terjeng man manusia tapi pe man taneh si iperjumai pe harus ibebasken (ngadi iperjumai).

Bentuk perayaan tahun Jobel i hubungken ras tahun sabat (tahun pepituken).Sabat eme tahun penantangen (perhentian),sebab sabat eme waktu sikhususken manusia ras kerina tinepaNa guna memusatken perhatian guna Dibata saja. Menurut para ahli padan sindekah lit dugaan maka tahun Jobel eme tindak lanjut arah praktek tahun sabat,si enda banci si idah ibas praktek kegeluhen si ilakoken bangsa Israel ibas Ulangen 15:1-11,ija perintah guna la nuani taneh entah pe merdang,iganti alu nasapken kalak si lit utangna (sasapkenlah kalak si rutang man bandu).Lit pendapat si ngatakenca enda me salah sada implikasi ibas perubahen cara nggeluh kalak Israel eme ibas masyarakat si perjuma (agraris)ku masyarakat kota (perdagangan).

B.Isi
Judul perikope ibas bahan khotbah eme tahun penangtangen,ibas pustaka sibadia (bhs karo)la ipake istilah tahun Jobel tapi tahun penangtangen.Ibas tahun pelimapuluhken arus imomoken man kerina rakyat belang-belang negeri kerna pembebasen man kerina penduduk.Kerina erta si enggo idayaken ibas tahun penangtangen enda iulihken man empuna sigel-gel,ntah man kesusurenna.asakai kalak si enggo idayaken jadi budak arus maka iulihken man keluargana.Ibas tahun enda arus i ulihken man empuna kerina tanah warisen si enggo idayaken. Arah sienda si dat gambaren bahwa kita manusia labo jadi penguasa i doni enda,tahun Jobel eme tahun pemulihen/penangtangen si ngingetken lalit kai pe si lit ibas doni enda sikerajangen manusia.Uga melala na pe budakna ia hanya sebatas memakai bukan memiliki,uga belangna pe tanehna ia hanya punya hak memakai,labo memiliki,emaka biakta labo biak menguasai ntah pe banci rate-ate man manusia antah pe man taneh si ipake kita.

Ibas tahun penangtangen enda la banci merdang,ntah pe perani gandum si turah-turah,ntah pe pepulung buah anggur si la iranggasi.Sada tahun e arus jadi tahun sibadia,ulih taneh si la iperjumai ngenca banci ipan.Sienda mereken pengertin maka kita manusia pe terbatas nge gegeh ras kengasupen,kita perlu istirahat,nadingken aktivitas (la merdang) dan memusatkan perhatian man Dibata saja.Pepulung erta sebanyak-banyaknya labo jadi tujun geluhta kalak sierkiniteken.Sada tahun e arus jadi tahun sibadia,si la mereken hasil (mereken untung,engg berkurang pendapaten) adi kin la banci iperjumai.Tapi ibas Imamat 25:21 i singetken Ïpasu-pasu tuhan taneh e bias man nakan dua tahun”,sienda mereken penekanen man banta maka Dibata pasti mereken pasu-pasuNa man kalak si taat ban baNa.

Ibas tahun penangtangen enda i singetken kerna nukur ntah ndayaken taneh sapih-sapih kalak Israel arus ilakoken alu bujur,erbahan erga la banci alu nipu tapi lit ije keadilen. Sienda mereken pengertin maka arus lit sisampat-sampaten antara kalak si bayak ras si musil,entah pe kalak bayak nampati kalak si musil.

C.Pengkenaina
Tahun Jobel eme sada suasana simereken keriahen ras kemaleman ate,sebab makna na mereken penekanen kubas keseimbangan ras keadilen i tengah-tengah doni enda.Lanai lit pembedaan si erbahanca kita la banci ersada.Sebab perbedaan rusr membatasi kita ngelakoken/nehken keleng ate si mereken keriahen .(bnd ogen) Emaka sebagai kalak si tek man Tuhan ibas kerina dampar kegeluhenta arusna min mereken dampak simehuli man sekelewetta,mereken pembebasen.Ibas Jesaya 61:1-2 teridah ije konsep kerna tahun Jobel ,ija Jesaya ermomo kerna berita keriahen ras pembebasen man kalak Israel.

Man banta kalak sitek man Tuhan,keriahen ibas tahun Jobel berarti kita i pulahi ibas biak-biak si la ngena ate Dibata,si rusur denga leket ibas kita.Ibas tahun enda enggo 125 tahun umur GBKP enda,si evaluasi enggo kin nagtang ibas kita nari biak-biak (keinginan daging) sigel-gel:perjudi,ACC,erelem-elem,sura-sura ngkuasai rsd..entah melala denga kita tertaban ibas biak-biak enda.

Tahun penangtangen si mereken keriahen si maknai alu ndalani kegeluhen enda alu mereken dampak si mehuli.uga kegeluhenta ncidahken keseimbangan ras keadilen man doni enda.La saja kalak si bayak nampati kalak si musil tapi kalak bayak e berusaha menarik si musil e ndarat ibas kemusilenna arah kai si banci ilakokenna.Kita sebagai gereja si nggeluh itengah-tengah masyarakat berbangsa ras bernegara pe perlu berperan ibas membebasken bangsa ta enda alu prilaku si adil ras benar.Robert P Borrong ibas bukuna”Partisipasi Kristen dalam membangun moral bangsa Indonesia”ngataken “partisipasi orang Kristen dalam membentuk moral bangsa Indonesia adalah dari keteladanan dalam perilaku sehari-hari yang bisa dijadikan panutan.

Refrensi
1.Pustaka Sibadia,LAI,2013
2.Soedarmo,Kamus istilah Teologia,Jakarta,BPK,Gunung Mulia
3.Ensiklopedi Alkitab Masa Kini,Jakarta,Yayasan Kumunikasi Bina Kasih
4.Robert.P Borrong,Partisipasi Kristen dalam membangun moral bangsa Indonesia,Jakarta,BPK,Gunung Mulia

Pdt Rena Tetty Ginting
GBKP Runggun Bandung Timur