Khotbah Kuan-kuan 23:17-23, Pekan Penatalayanen Wari IV, Rabu 21 Januari 2015

Invocatio:
Terpaksa igegehindu erdahin alu cur-cur panasndu, gelah taneh enda  banci mereken
ulihna man bandu, seh  mulih ka kam kutaneh, sebab ije nari kam  ijadiken. Ibas
taneh nari kam ijadiken, janah jadi taneh ka kam mulihken.”

Ogen: Lukas 14:28-32;  Khotbah: Kuan-kuanen 23:17-23             

Thema: Megermetlah Ngaturken perdalanen nggeluh

KATA PENARUH:
Ibas kita nggeluh i doni enda, megati kel asal entebu minter sipan erkiteken entabeh nari nge nanamna ari ateta, janah asal pagit banci jadi siutahken janah la kita nggit mansa erkiteken pagit siakap nanamna. Padahal megati kel janah banci jadi si pagit e mereken keriahen man banta erkiteken malem pinakitta ibanna, janah si entebu e banci jadi erbahansa kita mate erkiteken siakap pangan kepeken racun. Emaka lit kuan-kuan kalak karo ngatakenca, ”Si pagit e pe ula minter utahken banci jadi si pagit e tambar, janah si entebu e pe ula minter i bendut sebab banci jadi si entebu e racun”. Kuan-kuan enda megati ibahan jadi andingen kerna kegeluhenta enda. Sebab la sitik jelma lanai ndalanken si mehuli guna ndatken sura-surana ibas doni enda erkiteken melala kiniseran siihadapina janah bengket ku bas dalan si la payo guna ndatken sura-surana e. Janah  megati kel ibas kegeluhen enda manusia ndarami dingen ngayak-ngayak si ”entebu” e amin gia la igejapna maka si entebu e banci meneken ia janah mabai ia ku kematen. Bagepe pe enterem ka kel jelma nandingken si ”pagit” e amin gia la isadarina ibas ia nggengken si pagit e banci jadi e mereken kemalem ate bas geluhna. Emaka arah bahan khotbahta sekalenda iajuk kita guna ngangkai ugakin arusna kita nggeluh bas doni enda gelah sidat kemalemen ate situhu-tuhu e.Sue ras  temata pe maka nina: Megermetlah Ngaturken Perdalanen Nggeluh.

II. PENGANGKAN KERNA TEKS
Kitab Kuan-kuanen ikataken  ka amsal orang bijak, Sebab isina nuriken kerna pedah-pedah gelah kita bijak ibas ndalani kegeluhen aminna gia melala perbeben si man bentasen si arus ihadapi manusia. Umpamana, rusur kel kita membanding-bandingken kegeluhenta ras kegeluhen kalak si deban seh maka siidah kalak sideban suksesen asangken kita. Padahal banci jadi kita tutusen ku gereja, ertoto ras ngikuti kerina kegiaten gereja tapi melala perbebenta. Lit kalak la pernah ertoto-toto, perbahannenna pe la sentudu ras sura-sura Dibata tapi sukses geluhna secara doni. Emaka nina ibas Kitab Kuan-kuanen 23:7a ikatakenna “Ola morahi kalak perdosa. Erkemalangenlah man Tuhan, gelah terang wari-warindu si pepagi, dingen pengarapenndu pe la bene. Sebab morah ate (cian, mengga) ibas Mazmur 73 ikatakenna, “Mehuli kal Dibata man kalak si tutus, man kalak si bersih ukurna. Tapi menam aku celus, perban mengga ateku kempak kalak megombang, tupung kuidah kesangapen kalak jahat”. Engkai maka ula mengga ate nandangi kesangapen kalak jahat? Sebab kesangapen kalak jahat e la kekal. Emaka ikatakenna ibas Mazmur 37:1-2 ikatakenna maka nina. “Ola atendu nembeh kempak kalak jahat, ola mecimberu ngenehen si erbahan jahat, sebab bali ras dukut si kerah, minter me ia masap, mate me ia desken sinuan-sinuan si melus. Tapi Dibata tetap nge mereken kinibayaken ras keriahen doni enda nandangi kerina jelma janah mereken matawarina nandangi kerina jelma. Tapia amin bage gia kelengna ate Dibata nandangi kerina jelma tapi upah kalak si erbahan dosa eme maut (Roma 6:23) tapi nandangi kalak si tetap nggeluh ibas Tuhan kegeluhen si rasa lalap e jadi sikerajangenna.

Emaka ibas nas ta enda iajuk kita gelah tetap erkemalangen man Tuhan. Sebab nina ibas Mazmur 111:10, “bena-bena kepentaren eme erkemalangen man Tuhan. Man kalak si erkemalangen man baNa iberekenNa kap pemeteh si mehuli. Emaka guna ngadapi kegeluhen si tempa-tempa lanai siakap adil e sipemena la banci lang harus siinget erkemalangen man Dibata. Erkiteken sie kita harus ngangkai Kata Dibata bas geluhta enda ras nggeluh erkemalangen man Dibata gelah ngasup kita megermet ngaturken perdalanen geluh enda. Erkiteken sie kita selaku anak-anak Dibata, paksa siidah kegeluhen kalak singgeluh ibas dosa kita harus erkemalangen man Dibata gelah kita la ndabuh kubas cian ate ras morah ate nandangi kegeluhen kalak perdosa e seh maka kita la ikut ndabuh kubas sura-sura kalak si nggeluh bas dosa e. Emaka ibas kuan-kuanen 24:14 ikatakenna nina, “bage pe kepentaren perlu kel man pertendinndu. Adi pentar kam terang me wari-warindu si pepagi”. Emaka ibas ayat 18 ikatakenna gelah terang wari-warindu si pepagi dingen pengarapenndu pe la bene, paksa siidah kegeluhen kalak si nggeluh ibas dosa (la ngandalken Tuhan) mbue rejekina, ingetlah maka kegeluhen enda erdalan denga janah lit denga wari sipepagi. Emaka adi genduari kita lenga ndatken kesuksesen bagi kalak si nggeluh bas dosa ndai tetaplah setia ersembah man Dibata janah teruslah dahiken dahinta ibas gelar Tuhan ula ikut-ikuten ibas pergaulen-pergaulen donie enda si la payo iadep-adepen Dibata, la banci lang kedungenna icukupina kerina siperlu man banta (Mat.6:33).

Emaka ibas perikopta enda pengajaren siipake eme pengajaren sekalak orang tua nandangi anakna. Inti nasehat e eme, gelah kita ndalani kegeluhen enda alu bijak dingen erkemalangen man Dibata sebage palasna labo ngarapken kegeluhen bagi kalak perdosa. Sebab kalak si ernalem man Dibata geluhna terjamin ras erpengarapen. Erkiteken sie kalak si erkemalangen man Dibata la pediatna ia isesatken alu pergaulen si la mehuli. Kitab kuan-kuanenn  enda nuriken pergaulen sesat enda alu 2 contoh, eme: kalak pemabuk (ayat 20-21) ras diberu perdenggal (pelacur) ayat 27-28). Sebab ibas persadan kalak pemabuk kitape ikut-ikuten kisat erdahin perban kegeluhen e pe lanai bo jelas ibas ia janah lanai lit bas ia mediate nandangi kebenaren. Janah ergaul ras diberu perdenggal terjeng mereken keriahen kentisik ngenca, ujung-ujungna meneken geluh (ay.27-28). Bagem getemna pusuh orang tua natap anakna adi anakna e ndabuh kubas pergaulan sesat mabuk-mabuken, ergaul ras diberu-diberu perdenggal. Ibas sie Kitab Kuan-kuanen enda mbue kel nehken nasehatna man anak-anak. Anak-anak la banci lang harus megiken pengajaren nande-bapana gelah nande ras bapana e ermeriah ukur dingen anak-anak e pe malem atena nggeluh.

Emaka nina ndai pe ibas pengogenta iturikenna uga Yesus ngajarken kalak si ersura ngikutken Yesus. Emaka nina Yesus ibas Lukas 14:28-32, ise atena ngikutken Yesus la banci lang ia harus siap bayar harga. Harga si arus igalarina eme mpersilahang dirina sendiri. Ertina mengutamaken kepentingen Yesus e asangken kepentingenna (ay.33). Alu kata sideban labo berarti harus sibenterken kerina si lit ibas kita tapi si lit bas kita e sipakeken guna kepentingen Tuhan.

APLIKASI
Ibas Pekan Penatalayanen enda, ije me kita erlajar uga arusna kita nggeluh gelah megermet kita ngaturken perdalanen geluhta. Nggeluh erkemalangen man Tuhan alu bage kerina sidahiken kita e la banci lang mereken kemalemen ate man banta. Subuk pendahinta, usahanta, anak-anakta ras kerina keluarganta maba kemalemen ate man banta. Ingan si pemenana kel kalak ndatken pengajaren kerna kegeluhen eme ibas keluarga. Keluarga eme salah sada bagin ibas masyarakat si paling sederhana ingan terjadina proses pertumbuhen. Mbue kel si banci idatken ibas keluarga soal keteladanen terlepas dari teladan si mehuli entah lang. Tapi intina keluarga me ingan anak-anak si pemenana kel ndatken pemeteh. Emaka renungenta wari enda ibas Pekan Penatalayanen berngi sip e-IV ken enda  nuriken uga pentingna proses pertumbuhen sekalak anak ibas keluarga arah nasehat ras teladan si mehuli ibas orang tua nari. Tentuna arah kata Dibata siseh man banta enda ngajuk kita, maka sipemenana si la banci lang silakoken eme nggeluh erkemalangen man Dibata alu bage kerina pendahinta e maba kemalemen ate man banta. Erkiteken kita la ikut-ikuten ibas pergaulen doni enda she maka torah sifat kisat bas kita kedungenna lanai kita nggit ndahiken dahinta bagi si enggo ipadanken man manusia. Bagi nina introitusta: “Terpaksa igegehindu erdahin alu cur-cur panasndu, gelah taneh enda  banci mereken ulihna man bandu, seh  mulih ka kam kutaneh, sebab ije nari kam  ijadiken. Ibas taneh nari kam ijadiken, janah jadi taneh ka kam mulihken.” Tapi adi sidarami lebe kinirajan Dibata e janah sidalanken singena ateNa pasti pasu-pasuNa kerina sidahiken kita e. (Matius 6:33).

Pdt. Jaya Abadi Tarigan, S. Th.
GBKP Runggun Bandung Pusat