Khotbah Kejadin 12:1-3, Pekan Penatalayanen Wari I, Minggu 18 Januari 2015

Invokatio :  
Kerina bangsa-bangsa mindo denggo bangKu gelah Kupasu-pasu ia bagi enggo Kupasu-pasu
kesusurenndu e me perban kam erkemalangen man perentahKu." (Kejadin 22:18)

Ogen :   Roma 8:28-30; Khotbah  :  Kejadin 12:1-3

Thema :  “Idilo Guna Jadi Pasu-pasu”

Adi siperdiateken rumusen erkiniteken ibas kitab Heber eme “tek nandangi kai si iarapken kita, tek kerna si la idah”[1]. Tentu la seh ije saja, arus lit action, ertina teridah arah tindaken. Bagi sekalak perjuma tutus atena nuan-nuan erkiteken tek ia arah kai si nilakokenna e lit ulih bagi siniarapken. Bageme kiniteken si lit ibas Abraham, kiniteken e teridah arah patuh ia ngikutken perintah Tuhan berkat ku negeri si ipadanken Dibata man bana[2]. Ulihna eme kai si ipadanken Dibata jadi me bage man Abraham.

Kejadin 12:1-3 i je isuratken uga Dibata nehken perentahna man Abraham (Abram), “tadingkenlah kutandu, kade-kadendu, ras rumah bapandu[3], jenari laweslah ku negeri si kutuduhken bandu pagi”. Adi kita genduari ndatken perentah si bage uga nge kira-kira sikapta? Apai ka ibas inganta tading genduari cukup asetta, kade-kadeta pe merandal kerina, tambah rumah pe galangka. Bagem Abraham paksa pendilo enda reh. Menurut penelitian, Urkasdim paksa zaman Abraham enggo tinggi peradapenna, janah daerah e pe subur secara pertanian[4]. Tapi luar biasa kepatuhen Abraham, amin gia ibas ayat 1 bagin terakhir ikataken “laweslah ku negeri si kutuduhken bandu pagi”, berarti ingan e pe lenga bo jelas tapi patuh Abraham. Enda me si igelari kiniteken si la erpalasken untung ntah rugi. Payo lit nge janji Dibata ibas ayat 1-3. Janji e eme: ibereken Dibata taneh[5], nterem sinursur (jadi bangsa si mbelin), I pasu-pasu, popular/terberita, masu-masu kalak simasu-masu Abraham ras sebalikna isumpahi Dibata kalak si numpahi Abraham. Tapi kepatuhen Abraham tuhu-tuhu sada kepatuhen siman teladanen. Enda teridah ibas bagin seterusna ija lenga gia isehken Dibata janjiNa mereken kesusuren, sementara umur Abraham enggo 99 tahun ras Sara nderana 89 tahun[6], tapi la e rebanca monggar kiniteken Abraham[7]. Kepeken kiniteken sipayo lit ije kesabaren, kesetian, tetap ipujina Dibata. Erkiteken si eme ibas Pustaka Sibadia Abraham igelari “bapa kerina kalak si erkiniteken”.

Kita pe igelari anak-anak Abraham ibas tek man Yesus[8], erkiteken si e padan Dibata pe berlaku nge man banta. Selaku kesusuren Abraham, kita pe terhisap kubas pendilo ras padan Dibata man banta. Pendilo tek man Yesus Kristus berarti nadingken kecibal geluhta si ndekah[9]. Sabab merespon pendilo e, pertama kita harus tek, jenari sipeduaken pang nadingken kerina cara nggeluh si ndekah eme nggeluh erpalasken sura-sura daging ras doni enda[10]. Tentuna enda la nukah, bagi Abraham idilo nadingken kutana, keluarga, ras rumah bapana alu kata sideban nadingken kemapanen si lit. Tapi enda arus ilakoken adi ateta ngaloken padan Dibata. Padan Dibata si luar biasa eme keselamaten man kerina manusia, ras pada Dibata enda enggo sialoken ibas tek man Tuhan Yesus, erkiteken si e bagi Abraham ipasu-pasu gelah jadi pasu-pasu, maka kita pe si enggo ipasu-pasu ngaloken keselamaten jadi pasu-pasu pe man kerina jelma, ertina sisaksiken keselamaten ibas Yesus Kristus e baik arah nurikenca bagepe arah sikap geluhta si enggo berubah ras erbuah.

Payo, jadi pasu-pasu e tentuna arah kerina dampar geluhta, la saja nuriken kata Dibata, tapi pe termasuk kinilitenta pe. Abraham jadi pasu-pasu man Lot, jadi pasu-pasu man kerina kalak si jumpa ras ia (Abraham). Emaka mari ibas tahun si mbaru enda pe, tahun 2015 erpalasken proritas program GBKP eme “Peningkatan Sosial Ekonomi dan Budaya Jemaat, mari kita jadi pasu-pasu. Uga maka pasu-pasu e maler man banata jenari jadi pasu-pasu ka man kalak sideban? Sipemena, rembak kita ras Ia (Yesus)[11] teridah arah tutus ertoto, ngoge Pustaka Sibadia ras ersembah man Dibata arah ngikuti kegiaten-kegiaten gerejaNa, jenari si peduaken tutus erdahin, si peteluken siinget maka kita idilo guna jadi pasu-pasu. Bagi kata “terima kasih, terima kasih, terima kasih”. Sialoken si bereken, ibereken Tuhan si embarken  ka man kalak sideban. Bagem tandana kalak si erkiniteken, tuhu igejapkenna maka ia idilo Tuhan guna jadi pasu-pasu. Amin.

Pdt. S. Brahmana

[1] Heber 11:1[2] Heber 11:8[3] Berarti nadingken pe penyembahen keluarga Terah man berhala (bd. Yosua 24:2).
[4] Janji kepada Abraham, http://carelinks.net/doc/biblebasics-id/13
[5] Bd.Kejadian 12:7
[6] 25 tahun Abraham nimai maka janji kesusuren e isehken Dibata. Kejadin 12:4 isingetken Umur Abraham berkat I Haran Nari umur 75 tahun, janah paksa umur Abraham 100 tahun maka iberekenna Ishak.
[7] Baca Roma 4:19-22
[8] Bd.Galatia 3:29
[9] Kerna sienda lit ilustrasi: Ibaratken kita erperahu itengah lawit. Sanga itengah lawit reh ombak sigalang ngentam perahuta she pecah ras tenggelam. Guna nelamatken diri, kita hanya encikep papan si kitik. Erlangi kudarat ndauh, adi pe ipaksaken, pastilah tenggelam erkiteken keri gegeh. Adi mengandalken papan si kitik  e ngenca, epe tentula la mungkin. Sada paksa pulah nge si cikep papan e erkiteken latih ras keri gegeh. Ibas situasi putus asa, reh me sada kapal, jenari sekalak ndudurken tanna  guna nelamatken kita. Kai nge silakoken? Tentuna, si pemena tek kita maksud baik si ndudurken tanna e payo atena nelamatken kita, si peduaken kita pe sidudurken ka tanta menyambut uluren tan siatena nelamatken kita, si peteluken kita pe arus mulahi papan si cikep kita e. Bagem sindudurken tanna e ngelambangken Tuhan Yesus. Yesus enggo ngelakoken si seri man banta. Yesus ndudurken tanNa man banta, responsya tentuna mulahi kai saja si jadi andalenta sedekah enda (usaha, perbahanen si mehuli, bagepe kegeluhen si ndekahta) jenari sepercayaken ntah pe si endesken dirinta man Yesus saja alu kata sideban Yesus saja andalenta guna nelamatken kita.
[10] Bd.Galatia 5:19-21.
[11] Bd. Yohanes 15:4