Minggu 19 April 2020 ; Mazmur 42 : 1 -6
Minggu Kenca Paskah/ Minggu Quasidemogeneti: Bagi Anak-anak Si Mbaru Tubuh
Invocatio : “Kuangkat tanku ertoto aku man baNdu, desken taneh kelegon, muas aku man baNdu” (Masmur 143:6).
Ogen : 1 Petrus 2 :1-5
Khotbah : Masmur 42 :1-6
Thema : Ketedehen Ate Man Tuhan
I. Bena Kata
Kata Dibata wari enda themana emekap “Ketedehen Ate Man Tuhan”. Adi ibegiken seh kal jilena thema enda janah erpengarapen kami banci mpekeke semangat kinitekenta. Johanes Calvin pernah ngataken, “kualitas kiniteken sekalak jelma la isukati arah uga buena pemetehna kerna Dibata tapi arah hubungenna ras Dibata”. Uga hubungenta ras Dibata paksa enda? Seh kal nge malemna ate kalak si nggeluh rembak ras Tuhan. Emaka uga kin nge kerembakenta ras Tuhan sedekah enda? Lit kin nge ketedehen ateta man baNa?
II. Isi
Rasul Petrus mereken persinget man perpulungen gelah nehken kekelengen man teman manusia, janah nehken keunggulen Kata Dibata si ikatakenna benih si la banci mate nggeluh rasa lalap. Iteruskenna pengajarenna ibas suratna enda si jadi bahan ogenta ngerana ia kerna nadingken kerina si jahat. Dosa-dosa si lit ibas ayat 1 bahan ogen enda banci ncedai kekelengen bagepe ngambati uga gegehna Kata Dibata e, seh maka alu bage banci ngambati pembaharun kegeluhen kalak Kristen. Ikatakenna gelah ola erbual ntah pekulah-kulah, ercian ate ntah pe cekurak. Adi kalak nggo ibersihken ibas dosa nari emaka itadingkenna me perbahanen si jahat bagi si ituriken idatas ndai, erbual ntah pe pekulah-kulah bagepe ercian ate ntah pe cekurak. Emaka gelah turah terus kiniteken e perlu ibereken pangan si sehat tep-tep wari. Kewajipen si isaranken Petrus emekap lalap ate perpulungen perlu nandangi Kata Dibata si jadi pangan pertendinna gelah kegeluhenna pe terus mehuli. Ijenda me istilah Kata Dibata e igelari susu pertendin si lalit campurna. Emaka bagi anak-anak si mbaru tubuh si rusur muas nandangi susu pertendin si lalit campurna. Rasul Petrus ngingetken maka perpulungen e kerina nggo tubuh peduakaliken (lahir baru). Kegeluhen si mbaru perlu makanan si tepat. Erkiteken mbaru denga ipetubuh, harus tedeh atena susu pertendin. Bayi perlu ia susu arah nandena nari, janah sura-surana guna ndatken susu e seh kal megegehna janah lalap atena minem susu. Bage me kalak Kristen harus tedeh atena Kata Dibata. Alu cara sibagenda me kita banci bertumbuh, janah ertambah-tambah ibas kekelengen ras penandai kerna Dibata. Sura-sura si mbelin nandangi Kata Dibata merupaken bukti nyata kerna lahir baru man sekalak jelma. Pertumbuhen ras pertambahen ibas kepentaren ras kekelengen merupaken tujun ras ketedehen ate tiap kalak Kristen. Kerina sarana rohani tujunna nehken perbaiken ras peningkaten.Adi ipake alu benar, Kata Dibata la mpediat sekalak jelma tetap seri bagi sebelumna, tapi erban peningkaten ras mpehulikenca. Erkiteken kita kalak Kristen nggo ngenanami uga kiniulin Tuhan. Emaka olanai nggeluh ibas dosa. Jesus e si nampat kita erkiteken Ia me batu si nggeluh si itulak ras la iergaken manusia tapi Ia si ipilih dingen iergaken Dibata. Ia ikataken batu guna ncidahken gegehNa si la tertaluken ras keberadanNa si rasa lalap. Emaka erkiteken kitape erpengarapen kempak Jesus selaku batu si nggeluh, kita pe haruslah jadi batu-batu si nggeluh sibereken ka dirinta ipake guna majekken rumah pertoton kesah.
Ibas Masmur 42:1-6 Pemasmur erban ungkapen ketedehen atena man Dibata. Bagi belkih mejehe nandangi lau si maler. Ertina adi belkih mejehe nandangi lau si maler apai kai bas musim perlego, bage ka me Pemasmur metedeh guna jumpa ras Dibata si nggeluh. Adi belkih metedeh atena nandangi lau guna kegeluhen, bage ka me Pemasmur metedeh ia man Dibata, simereken kegeluhen. Ketedehen Pemasmur enda tuhu-tuhu merupaken spiritualitas si mbages. Ketedehen guna jumpa ras Dibata si nggeluh merupaken inti kiniteken Pemasmur. Pemasmur itandaina ise Dibata e, janah ietehna Dibata e pasti ngkelengi ia janah ia pe keleng atena man Dibata.Selaku kalak si erkiniteken, sia-sia me adi penembahen ras persembahen si ilakoken kita la kita ngerembakken diri ras Tuhan. Adi la ipalasi hubungen rembas ras Tuhan maka penembahen ras persembahen si ilakoken kita banci jadi rutinitas ibadah si erbanca bosan. Hubungen si akrab ras Dibata, si idahiken alu kiniteken, mendorong Pemasmur mpermuliaken Dibata amin pe nggeluh di antara kalak si la sada kiniteken bahkan ngadapi ancamen. Mari siperdiateken, belkih harus minem lau gelah nggeluh, bage ka me Pemasmur metedeh/muas man Dibata si mereken ia kegeluhen. Ibas taneh pembuangen kalak si tek man Dibata, Dibata si nggeluh, la mpediat dirina terpenjara ibas persoalen e jine. Kalak si tek harus erpengarapen man Dibata.
III. Pengkenaina
Langit pasti labo lalap biru warnana janah kegeluhen end ape labo maka lalit persoalen. Dibata la pernah erjanji man banta kegeluhen enda lalap mulus saja. Tentu kerina kita manusia pasti ndatken perbeben. Persoalenna eme uga kita ndarat ras menang ngelewati persoalen si ihadapi kita. Pemasmur amin pe gulut ukurna tapi mis ia keke. Kata Dibata enda banci mereken semangat man banta mulihken mbangun semangat kiniteken guna lalap tedeh man Dibata. Gundari enda, labo la mungkin kalak reh mekelekna pinakit egoisna, erpenalem ia kempak pemetehna jine. Payo, gundari enda lit karya seni ras teknologi si canggih bagepe erbanca manusia mesunah ndalani kegeluhen tapi kesusahen kegeluhen lalap nge lit sue ras persoalen kegeluhen si ihadapi manusia. Teknologi la njanjiken kemalemen ate ibas kegeluhen manusia tapi terjeng mereken kemudahen. Sanga persoalen kegeluhen la terdungi man ise kita ngadu? Bagi Pemasmur, mis ia ngarap man Dibata. Kata Dibata enda mabai kita guna rembak ras Tuhan. Minggu enda eme Minggu Quasimodogeniti (Bagi Anak-Anak Simbaru Tubuh). Kita harus lalap erpenalem man Dibata. Raduken Dibata kita pasti nggeluh, turah bagi batang kayu i tepi lau anak, tapi adi la ras Dibata kita pasti reh kitikna janah mate. Mari sirenungken Kata Dibata enda, “Alu sinik kutimai Dibata ngkelini aku, sabap man baNa saja ngenca aku ernalem” (Msm. 62:2).
Pdt. Abdi Edinta Sebayang, M.Th
GBKP Rg. Graha Harapan
