Pekan Kebaktian Keluarga , Matius 2 : 1-12 Wari VI 2017

BAHAN PEKAN KEBAKTIAN KELUARGA WARI VI TAHUN 2017

 

Invocatio        : Sabab bage pengkelengi Dibata doni enda, e maka ibrekenNa AnakNa Sitonggal, gelah ola bene isie pe si tek man Bana, tapi gelah dat kegeluhen si tuhu-tuhu si la erkeri-kerin. (Yohanes 3:16)

Ogen               : Jesaya 61:1-2

Khotbah         : Matius 2:1-12

Tema               : Dewasa Ernatal

Metode           : Encakapken aksi Natal

 I.Perlebe

Bulan desember eme bulan sisibuk man kalak Kristen. Mbue persiapen siilakoken kalak Kristen guna menyambut Natal ntah pe peristiwa ketubuhen Yesus Kristus. Ibas PKK minggu si pe-6 ken enda, Kata Dibata si seh man banta nuriken kerna piga-piga kalak si menyambut Natal e ntah pe ketubuhen Yesus Kristus ku doni enda bagepe persiapen-persiapen di ibahanna.

II. Penjelasen

Menurut Heredotus sekalak sejarawan istilah guru-guru i Timur nari ntah pe orang Majus asalna suku bansa Madai si erjabaten selaku imam i Kerajaan Persia. Kalak si bijaksana (bd. Daniel 1:20; 2:27; 5:15) ato penafsir nipi. Maka kemungkinen Guru-guru i Timur ‘ahli nujum’ agamawi labo Yahudi si banci ngertiken kerna bintang-bintang si lit. Ras lit kesimpulenna bahwa bintang si lit e mpetandaken sekalak raja agung kalak Yahudi enggo tubuh. Paksa guru-guru i Timur e ngidah bintang si labo bagi bintang biasa maka turah ibas ia guna ndarami asal bintang e, sebage tanda litna ketubuhen sekalak raja. Perdalanenna guna ndarami raja e labo perdalanen si mudah, sebab guna seh ku Yerusalem kemungkinen memerluken piga-piga wari i Timur nari. Bage pe kenca seh ku Yerusalem ijumpaina Herodes selaku raja ije guna nungkun kerna raja si tubuh e. Paksa Herodes mbegi kerna cerita guru-guru i Timur e, ia pe sengget ras kerina anak kuta Jerusalem (ayt. 3). Maka ipepulungna imam-imam si mbelin ras guru-guru agama Yahudi guna ndatken informasi maka nina raja si tubuh e lit i kuta Betlehem sue ras kai isuratken nabi-nabi. Kenca sie isuruhna guru-guru i Timur e berkat ku Betlehem guna ndarami raja si tubuh e ras mindo gelah adi enggo jumpa banci guru-guru i Timur jumpai Herodes gelah ia pe nembah man raja si tubuh e. TapiDibata mpersingeti Guru-guru i Timur gelah arah nipina gelah kalak e la mulih arah Herodes tapi  mulih ku arah sidebanna. Sebab banci Herodes erbahan si la mehuli nandangi guru-guru i Timur e (ayat 12)

Kenca guru-guru i Timur enggo jumpa ras Yesus meriah kal ukurna ibrekenna erta-erta man Anak si mbaru tubuh e, eme emas, kumenen ras mur. Menurut J.J. de Heer kerehen guru-guru i Timur sebage tanda bahwa i bas Kristus ‘nubuat-nubuat’ i bas Padan Si Ndekah enggo tergenapi (bd. Maz. 72:10) bahwa bangsa-bangsa asing mereken persembahen man Raja Mesias, ras ibas kitab Matius e ncidahken bahwa kalak asing mpelebei kalak Yahudi guna ngalo-ngalo Yesus. Persembahen guru-guru i Timur e mereken persinget bahwa ngakui Yesus Kristus sebage Raja harus iikuti kerelaan guna erkorban man IA.

Emaka piga-piga tanggapan kerna ketubuhen Yesus si teridah ibas Matius 2:1-12 :

1.      Alam Semesta ncidahken arah bintang trang guna mberitaken ketubuhen Raja e man doni.

2.      Kalak asing ntah pe guru-guru i Timur menanggapo ketubuhen Raja e arah mereken persembahen man baNa. Sejak awal kitab Matius ncidahken kerehen Yesus e guna nyelamatken labo hanya kalak Jahudi tapi non-Jahudi pe. Guru-guru i Timur eme ahli perbintangen si ndalami kerna langit, bintang e nuntun ia kerina ku Kata Dibata ras Kata Dibata naruhken ia ku Juruselamat (bd. Maz. 19). Hal enda ngertiken man banta bahwasana Dibata banci ngerana man banta arah cara-cara si banci ipahami kita.

3.      Herodes nanggapi alu kebiaren ras ‘penipuan’. Sebab atena la lit raja sideban banci ngancam kekuasaanna.

4.      Imam-Imam mbelin ras guru-guru agama Yahudi mereken informasi si tepat, tapi la nanggapisa alu tepat. Itehna kerna berita ketubuhen Mesias e ras la ndauh i bas ia nari tapi labo ia ngit jumpaisa . Kai gunanna ngangkai kerna berita-berita keselamaten arah Pustaka Si Badia adi kegeluhen e la lit perubahen.

 

III. Pengkenai (Aplikasi)

            Peristiwa Natal ntah pe ketubuhen Yesus Kristus merupaken Berita Si Meriah man kerina bangsa ras kerina isi doni enda. Peristiwa natal sekaligus sebage titik balik sejarah doni enda. Sebab Yesus reh duna balikken doni si erdalan kuarah kebinasaan mulih ku dalan keselamaten (Yoh. 3:16).

            Guru-guru i Timur ngalo-ngalo Natal (ketubuhen Yesus Kristus) alu kerelaan guna erkorban. Ia labo reh jumpai Yesus guna mindo tapi mere man Yesus. Ia reh ku Yesus guna ndatken ‘sesuatu’ tapi ‘kehilangan sesuatu’. Arah kerelaanna erkorban, ia ndatken ‘sesuatu’ si la banci inilai alu erta eme ‘sukacita penuh’ ibas Tuhan (ayat 10). Keriahen si naluken waktu, tenaga ras erta si pedaratna. I bas kita mbengketi bulan Natal ola sempat kita kebeneen pasu-pasu Natal e. Tapi aloken pasu-pasu e arah kita jadi pasu-pasu  man kalak si deban. Sirenungken kai si banci kubereken man Tuhan ibas Natal e? Kai si banci kubereken man Gereja? Kai si banci kubereken man kalak si deban i bas Natal e? Waktu, tenaga ntah ertanta?

            Tema PKK wari si pe-6 ken Dewasa Ernatal, dewasa ertina memiliki kematangen ras tanggungjawab simencerminken karakter si mehuli. Mediate nandangi semehuli, nggit ngaloken dingen patuh man pedah-pedah si mehuli. Emaka dewasa ernatal berarti ngasup erbahan si mehuli man kalak sideban espalasken keleng ate Kristus si enggo tubuh man manusia ras doni enda. Dewasa ernatal labo memikirken hal-hal materi ntah pe lahiriah. Andar Ismail ngataken ibas Natal kita banci ‘terperosok’ ku komersialisasi Natal. Tampa sisadari Natal banci sijadiken sumber rupa-rupa bisnis ras rezeki. Natal la terpisahken i bas pohon terang, kartu natal kue natal, tour natal rsd. Si setuhuna labo lit kaitenna ras ketubuhen Yesus.   

            Kristus enggo tubuh, keselamaten enggo itawarken man kerina kalak singit ngaloken IA, kabar e enggo ibritaken terus menerus, labo hanya sekedar bagin tradisi perayaan Natal i gereja. Tapi kabar e ibritaken gelah kerina jelma sadar bahwasana ia enggo ibereken kesempaten menikmati i bas Yesus Kristus keselamaten. Emaka Natal man kerina manusia, terlebih kita si enggo ngaloken Kristus ibas kegeluhennta perayaan Natal seharusna jadi sada peistiwa si banci lebih erbahan si mehuli alu tetap jadi pasu-pasu man kerina jelma. Mari si bahan perayaan Natal i bas tahun enda labo hanya keri ngukuri kerna baju baru, pernak pernik Natal si mewah, makanan Natal,ras sidebanna si kerina banci menghabisken dana puluhen juta tapi la lit nanamna man jelma sideban. Sibahanlah aksinta guna sekelewetta gelah keriahen Natal e banci inanami kerina jelma (bd. Yesaya 61:1-2). Bagi ketuhen Yesus maba keriahen man kerina manusia ras doni enda si ngaloken IA. 

 Pdt Mulianta  Enaria br Purba

081282882862