Kebaktian Pekan Keluarga Wari Ketelu : Jesaya 58:6-12

Bahan: Jesaya 58:6-12

Tema: Tetap Megegeh ras Mejuah-juah

1.Kata Perlebe

Tiap jelma pasti ersura-sura ndatken kejuah-juahen ibas kegeluhenna, erkiteken sifat jelma eme ndatken simehuli ras bagi sura-sura. Kamus Bahasa Karo pengertin kata Mejuah-juah memiliki arti tentang keseimbangan dan keselarasan hidup, baik antara manusia dan manusia, antara manusia dengan lingkungan dan antara manusia dengan Tuhannya. Ketiga hal tersebut adalah merupakan satu kesatuan yang bulat yang tidak dapat dipisahkan satu dengan yang lain. Janah  adi lit perjumpan sada ras sidebanna ibelasken alu kata mejuah-juah.

Ibas bahan pekan penatalayanen ta si peteluken enda Kitab Jesaya ras 1 Tesalonika ngerana mengenai Megegeh ras Mejuah-juah. Guna ndatken si e la banci lang harus  lit usaha si harus idalanken kerna si mehuli, dingen lit “Sumber” ntah pe “Ulu” si jadi pengarapen eme Tuhan. 

2.Isi

A.Invocatio

Ibas bahan invocatio ta enda nuduhken padan Dibata kerna pemulihen bangsa Israel kubas kiniulin ras kemakmuren. Nina Dibata “tapi Aku sinambari kuta ras rayatna dingen kubereken mulihi kejuah-juahen” Pemulihen ibas pembuangen nari eme inisiatif Dibata, aminna pe paksa si e bangsa Israel mindo penampat man Dibata.  ije ka me teridah kekelengen Dibata man bangsa e  bagepe man kalak si erlebuh man baNa.  Perbahanen si mbelin ilakoken Dibata guna mereken gegeh ras kinijuah-juahen man banta aminna sedekah enda lit perbeben ras pinakit.   

B.Ogen

Tema umum pekan penatalayanenta eme “Erberita si Meriah Arah Tinepa” ibas bahan ogenta 1 Tesalonika 2:7-12 enda me teridah uga Rasul Paulus meritaken berita si meriah, janah ibas ia erberita e melala perbeben si alamina eme ifitnah bagepe igombang-gombangi kalak Pilipi (ayat 2). Perbeben si hadapi Paulus ras teman-temanna la erbahanca kote ntah pe ngadi erberita. Dibata ras ia erbahanca ia tetap megegeh, sebab uluna ibas Dibata nari.

Bagin ogen enda merupaken salah sada pembelaan diri Paulus ras teman-teman na ibas kebenaren. Ikataken Paulus maka situhuna lit hakna mindo kai-kai pe man perpulungen e, tapi la ilakokenna gelah ola sempat iakap perpulungen e jadi tanggungenna ntah jadi beban. Emaka itegasken Paulus maka suari ras berngi ia erdahin dingen erberita. Ije nuduhkenca maka Paulus arah talenta na sebagai pembuat tenda ibas ulihna ipakaina guna keperlunna bagepe ibas erberita. Paulus menyeimbangken antara Pekerjaan dan Pelayanan. Teridah arah si e maka Paulus ras teman-teman na megegeh dingen mejuah-juah aminna pe ibas tengah perdalanen pelayanen turah la bagi ukur. Paulus erberita la terjeng arah pelayanen, tapi pe erberita arah pendahinna. Bageme kita ituntut selaku kalak si tek banci erberita man sekelewetta arah pendahinta bagepe situasi kegeluhennta.  

C.Kotbah

Jesaya 58:6-12 enda igelari Trito Jesaya ija situasi bangsa Israel enggo ndarat ibas perbudaken nari janah enggo mulih ku Jerusalem. Ije teridah maka Dibata nehken padanNa man bangsa Israel, janah penekanenna man bangsa e eme gelah tetap mperdiateken keadilen ras kebujuren nggeluh, dingen mperdiateken persembahen ras pertoton  ibas kiniteken sebab eme gegeh man bangsa e dingen ndatken kejuah-juahen ibas ia ndalani kegeluhenna. Ibas ayat 6 tole ije ipersingeti bangsa Israel uga kin cara erkiniteken si benar terlebih ibas ndalanken puasa.

Puasa ibas bahasa Ibrani “tsom” ertina la man ras la minem. Secara teologisna kalak si ngelakoken puasa eme sikap Penguasaan Diri dan Penyangkalan. Puasa ibas Padan Sindekah ije lit mengandung makna “kana” ertina Merendahkan Diri (1 Raja2 21:29). Sekalak teolog si tergelar Guthrie Jr ngatakenca maka puasa ntah tsom enda eme Berpantang ibas kerina pangan jasmani janah akibat berpuasa enda mengakibatken “Penderitaan Jiwa”. Emaka terdauhen pengertin puasa enda ikatakenna menghilanghkan kesenangan tubuh dengan menangis dan mengenakan kain kabung dan abu serta merendahkan jiwa untuk maksud rohani. I tengah-tengah bangsa Israel erpuasa enda adi ilakoken sedalanen make Kain Kabung ras Abu, ise si ngelakokenca berarti ia sangana erpuasa dingen nuduhken pertobatenna. Janah labo terjeng i tengah-tengah bangsa Israel ngenca, tapi pe i daerah Timur Tengah kuno adi lit ancamen hukumen ras nuduhken pertobatenna ibas kesalahen ras dosa si lakokenna. Peristiwa Puasa besar-besaren nuduhken pertobaten eme Niniwe, ija si ngelakokenca la terjeng Raja ras rakyat, nguda ntah metua, tapi pe ikut ras asuh-asuhen, janah kerina make kain kabung (Juna 3:1-10). Bagenda me puasa si biasa ilakoken dingen jadi ritual.

 I bas bahan kotbah enda kerna pelaksanaan puasa paksa si e i kritik sebab puasana salah dingen la bagi siniarapken Tuhan. Adi sipepayo ndai pengertin puasa labo terjeng la man ras la minem, tapi puasa dingen nadingken perbahanen si la bujur bagepe menindas kalak sideban. Nina Dibata “osarilah rante  pengiket janah aguilah baban kinilabujuren, janah bebaskenlah kalak siidehkenndu” kata osari ije ertina ngelepasken, bebas, lanai lit si ngendaliken kubas si la mehuli jadi kebiasaan. Adi enggo iosari pengiket e, iterusken alu perbahanen mereken pangan man si kelehen, mereken kalak kesilang dingen mereken uis man kalak si la ruis. Adi perbahanen si mehuli e ilakoken maka nina Tuhan “adi ertoto kam, kudengkehken pertotonndu, janah adi erlebuh kam, minter Ku aloi”. Ertoto eme ulu ntahpe sumber gegehta guna ndalani kegeluhen bage pe ndalanken undang-undang Dibata. ibas perbeben dingen masalah memang banci erbahanca kita kote, tapi arah pertotonnta banci mereken gegeh man banta guna mentasi perbebenta aminna pe lenga erkedungen, ije me situhuna kita ngaloken kinijuah-juahen arah Dibata nari.  Enda me persinget ras pengajaren si isehken man bangsa Israel, ula munafik arah perbahanen puasa tempa-tempa ndalanken kai si ngena ate Dibata, padahal ndauh arah si e maka kepeken jadi topeng guna ngelakoken perbahanen si la mehuli. Adi iperbandingken ras pengajaren Yesus  puasa ibas Matius 6:16-18, adi erpuasa ula bagi kalak si pekulah-kulah, ipeberjut-berjut ayo gelah iteh kalak erpuasa, tapi harus erduhap dingen suri buk ertina sipesikap dirita gelah teridah tetap sikap dingen la kote. 

Ayat 11-12 enda nuduhken maka perbahanen Dibata e tuhu-tuhu mbelin man kalak si ndalanken undang-undang Dibata. janji Dibata “Kubahan kam tetap megegeh ras mejuah-juah, kam desken peken si la kurang lau, desken sumbul lau si la pernah kerah” kita megegeh adi Dibata erdahin ibas kita dingen ndalanken singena ateNa, janah adi mejuah-juah kin ateta. Peken si la kurang lau eme dirita, secara kiasenna aminna pe wari lego, lit perbeben ntah ipuasaken si erbahanca kote, tapi erkiteken penampat Dibata peken e tetap teridah sikap, adi geluhta ndai tetap teridah megegeh ras mejuah-juah. Bangsa Israel ngaloken padan Dibata e, sebab kai sedekah enda si enggo runtuh ipajekken mulihi, benteng-benteng ras rumah ipekena mulihi dingen teriani.

3.Pengkenaina

1.Ibas kegeluhen tiap jelma pasti ersura-sura maka kegeluhenna tetap lit ibas Mejuah-juah, tapi sendalanen ras sura-sura e maka perbeben ras kiniseran jadi ayam-ayam geluh tetap lit bas doni enda. Perbeben ras kiniseran enda la terjeng rehna ibas manusia nari, tapi pe banci rehna ibas alam nari, si berbentuk bencana alam bagepe masa si gundari Virus Corona, banci si idah kerna kejadin e laterjeng harta benda ngenca bene, tapi lebih asa si e kebenen anggota jabu. Ibas kejadin e kerina manusia kote dingen lemah, janah ije me kita perlu gegeh. Gegeh situhu-tuhu eme ibas Dibata nari, uga kita erjimpuh ilebe-lebeNa arah pertotonta nuduhken kita enda labo kai pe iadep-adepenNa.     

2.Perdalinen geluh manusia ibas ndarami gegeh ras mejuah-juah iakap manusia e maka adi sura-sura enggo tersehi, baik ibas materi, harta ras jabaten. Erlajar arah bahanta maka Raja si meganjang kedudukenna dingen pengawal istana si megegeh banci redas dingen runtuh kerina tembok-tembokna adi la kin Dibata jadi ulu ibas kegeluhen.  Ibas si e nduhkenca maka ula lit sifat egois bage pe meganjang ukur aminna ise pe kita, sebab Dibata ngenca ngasup nambari kuta dingen pinakit (invocatio), ibandingken masa pandemic enda, adi la seijin Tuhan kerina usaha manusia sia-sia. Negeri bagepe rumah-rumah banci teriani adi Dibata ringan ije, tembok-tembok si redas banci ipekena adi Dibata ikut campur tangan (ayat 12)

3.Paulus ras teman-teman na sepelayanen nuduhken kerna kerja sama simehuli ibas talenta pendahin ras pelayanen. Ibas kiniersadanna e nuduhken maka isamping Dibata si mereken gegeh ras kinijuah-juahen, kepeken harus lit usaha ibas kita guna ndatken gegeh ras mejuah-juah. Kiniersadanta ibas erberita jadi gegeh man banta, la kita kote, la kita lemah, tetap er lau aminna perlego. Pendahin si lit bas kita sipakeken alu mehuli bagi singena ate Dibata banci mereken mejuah-juah man banta bagepe anak jabuta, janah ula kel sempat pendahinta maba mala petaka kubas jabu.

Pendahin ras Pelayanen penting, arah pendahinta sekalak-sekalak banci erberita njaga tinepa Dibata, ula sicedai, adi lit ceda radu ras mpesikapsa, gelah ula sempat siakap tinepa Dibata enda maba mara man banta, padahal pengulahta nge kerna tinepa enda maka jadi perbeben man banta. Janah pendahinta banci sipakeken jadi gegeh ibas erberita ras melayani, saja ipersingeti kita arah kata Dibata enda, maka ula sibahan pendahin ras pelayanenta jadi topeng ntah pe kemunafiken, bali ras bangsa Israel si ngelakoken puasa tapi perbahanenna ndauh ibas sura-sura Dibata nari.  

Pdt Julianus Barus

GBKP Bandung Pusat