Suplemen PA Moria : Kuan-kuanen 15 :1-4 ; Tgl 11-17 Juli 2021

“Ranan Si Pegeluhken”

Kuan-Kuanen 15:1-4

Pengajaren kerna kata-kata hikmat sipemena banci idatken ibas ayat 1. Pengajaren enda ncidahken seh kal belinna kuasa kata-kata ibas kegeluhen manusia. Kata-kata enda banci ncedai, tapi banci e mbangun keharmonisen kegeluhen tiap manusia bagepe masyarakat. Jabap simelias mantak rawa si gara. Pengajaren enda kerna uga seharusna sekalak jelma ngadapi kinirawan, eme alu make kata-kata hikmat, labo pekulah-kulah. Kata-kata e lemah lembut seh maka ngasup nilahken ranan sipanas. Makna istilah sipake guna “jabap” labo terjeng mereken jawapen nandangi penungkunen, tapi kempak mabai ntah pe ngaloken ajaken guna sada diskusi.

Pengajaren kerna kata-kata hikmat ibas ayat 1 ilanjutken ibas ayat 2. Kata-kata hikmat sinimaksud ibas ayat enda eme kata-kata kalak benar. Kata-kata sibelaskenna mbedaken kalak benar ras kalak bodoh. Ranan kalak pentar dem alu pemeteh. Kalak pentar la terjeng nggeluh pentar, tapi pe lit ibas ia pemeteh. Kegeluhenna erpalasken kempak prinsip kebenaren, keadilen, ras kiniulin situhu-tuhu iperluken guna kesejahteran masyarakat. Istilah Ibrani sipake guna pemeteh maknana umum, tapi sinimaksud ibas ayat enda eme pemeteh moral, praktis, ntah pe teknis. Jadi, adi kalak benar ngerana, ranan sibelaskenna la saja ranan sibenar, mehuli, adil, pentar erkiteken erpalasken pemeteh siakui masyarakat umum, tapi pe ipertimbangken leben alu mehuli. Tapi ranan kalak bodoh lalit ertina. Kejahaten ras kebodohenna erbanca ia mbelasken hal-hal sijahat ras bodoh, siterbegi lebih jahat ras bodoh erkiteken ibelasken saja alu sembarangen, la iukurina leben.

Ibas pengajaren kerna kata-kata hikmat sibenar ras kata-kata sibodoh sijahat ras ncedai keharmonisen kegeluhen masyarakat ibas ayat 1 seh ayat 2, itambahken sada persinget maka kepeken Tuhan mperdiateken tiap perbahanen, kata-kata manusia. Ibas kerina ingan lit mata Tuhan. Perbahanen Dibata mperdiateken ibas ayat enda la terjeng ngidah, tapi pe ertimbang ras ngadili bagepe mereken balasen siseri. Pengadilen Tuhan labo erpalasken aturen manusia, tapi aturen Tuhan jine.

Pengajaren kerna kata-kata hikmat berikutna isehken ibas ayat 4. Kata-kata pentar eme kata-kata sierban malem jelma. Ranan sipentar mereken kegeluhen. Ibas ayat enda seh kal belinna pengaruh ranan nandangi tiap pribadi sideban ntah pe nandangi anggota masyarakat. Ranan sibenar ras ibelasken alu tepat banci ngapuli, mpepinteri, mpegegehi, ndungi masalah, mbangun kegeluhen mpeturah kegeluhen kalak sideban simegiken ranan e. Sementara ranan bodoh singelukai pusuh. Ranan enda erbanca kalak simegikenca putus asa seh maka ranan e ncedai perbahanen, bagepe kegeluhen kalak sideban. Ranan sibage pe banci ncedai keharmonisen kegeluhen masyarakat.

Pdt. Andreas Pranata Meliala, S,Th

GBKP Rg. Cibinong