Suplemen PA Moria : Masmur 143:8-10 ; Tgl 13 - 19 Oktober 2019
Ogen : Mazmur 143:8-10
Tema : “Kupakeken KepentarenNdu”
· Kata Penaruh
Ibas kegeluhenta si tep-tep wari erbage-bage si man alanken ras si man dahinken. Ibas si e perlu kal kita kepentaren si rehna ibas Dibata nari ibas ndalanisa gelah kai si idahiken kita e lit gunana man banta ras man kalak si deban (kita jadi pasu-pasu ibas kegeluhenta) ras terpuji gelar Dibata.
· Mpebagesi pengankan kerna ogen
Mazmur 143 enda encidahken uga Daud si sangana ibas kiniseran si mberat erkiteken imbang-imbangna ngelis-ngelis ia janah ersura-sura guna meneken ia. Erkiteken si e labuh kal ia, kote, lanai lit gegehna janah enggo bene ukurna. Penggejapen Daud ibas kekotenna ia seri ras kalak si enggo ndekah mate. Tapi ibas situasi si bage rupana, Daud nginget keleng ate Dibata ibas wari-wari si enggo lepas si perna igejapkenna, uga Dibata engkelini ia tupung ibas kesusahen. Iukur-ukuri Daud maka Dibata e Dibata si erkuasa ras erkeleng ate man kalak si tetap erpengarapen man baNa. I pekusur-kusurna ibas ukurna emaka keke ukur Daud, lit semangat si mbaru idatkenna, emaka ertoto ia man Dibata. (ay 1-7)
Ayat 8. Ibas ayat enda metedeh Daud gelah tep-tep erpagi-pagi Dibata mpersingeti ia kerna keleng ateNa. Sebab ibas Daud nggejapken ras nginget-nginget kerna kuasa ras keleng ate Dibata e erbanca tetap ukurna, igejapkenna Dibata si erkuasa jadi temanna. Sebab Dibata e la pernah nadingken ia, tetap ikawaliNa ku japa pe perdalanna. Erkiteken si e man Dibata saja ngenca ia ernalem.
“Pertotonku ku penangkih man baNa”; arah pertoton si isehken Daud man Dibata, igejapna kuasa Dibata e erdahin. Arah pertotonna idatna gegeh si mbaru ibas Dibata nari. Bage pe arah pertotonna, Dibata mabai ia ras nuduhken dalan si man dalanenna. Sebab adi Dibata si nuduhken dalan labo maba ku bas kebenen tapi kubas kesenangen (bnd. Mazmur 23)
Ayat 9-10. Ibas ayat enda nuriken uga Daud nggejapken maka Dibata e eme inganna cicio, ingan cilinggem, ingan erpengendes si mereken serpang pulah ras kemalemen ate. Iakuina Dibata emekap Dibatana si erkuasa ras mehuli. Emaka metedeh ia tetap iajari Dibata guna ndalanken peratenNA. Sebab adi Dibata si ngajari ia ibas kegeluhenna, la lepak si ilakokenna, ras la ia mengandalken gegehna jine tapi kepentaren Dibata jadi penggurun ibas ia ndalani kegeluhenna ras muat keputusen-keputusen si arus iputuskenna.
Ayat 11. Ibas kiniseran si ihadapi Daud, igejapna tuhu-tuhu kote ia bahken igejapna ia desken kalak si inggo ndekah mate (ay. 3). Emaka erpengarapen ia man Dibata gelah ipegeluh Dibata min ia, sebab Dibata kap si mada kegeluhen. “pegeluh min aku” se enda pe imaksudken gelah mulihi turah semangat, pengarapen ras kiniteken Daud. Alu bage Daud banci pulah ibas kesusahenna nari.
Ayat 12. Ijenda Daud mindo keadilen man Dibata, gelah Dibata mereken ukumen man musuh-musuhna si enggo ngelakoken si jahant man bana. Ijenda Daud mindo pebelan ibas Dibata nari, erkiteken Dibata e Dibata si perkeleng, erkiteken kekelengenNa gelah Dibata ertak-tak andangi imbang-imbangna.
· Pengkenaina
Ibas kegeluhenta si tep-tep wari erbage-bage si man alanken, subuk bagi ukur ntah la bagi ukur, melala perbeben ras tantangen. Ibas si e kita pe megati kote ibas ndalani kegeluhenta, merasa putus asa ras kelsehen. Tapi adi erlajar kita arah kegeluhen Daud ibas ngalaken perbebenna, ia tatap erpengarapen
ras erpengendes man Dibata. La iandalkena gegeh ras kepentarenna, tapi Daud mengandalken kepentaren ras gegeh Tuhan. Ibas persandanna ras Dibata ibas tep-tep wari, Daud:
1. Ngasup nggejapken keleng ate Dibata
2. Ndatken pengajaren ras kepentaren
3. Ndatken serpang pulah ibas Dibata nari ibas kerina perbebenna
4. Ndantken keadilen ibas Dibata nari
Bage me pe arusna kita, tetap ngerembakken dirinta ras Dibata gelah tetap kita mengandalken IA, alu bage si dat serpang pulah ras kemalemen ate. Adi si penalem gegeh ras kepentarenta, labo kita ngasup, kote me kita janah talu pe, erkiteken gegeh ras kepentarenta terbatas. Tapi Dibata e la ersibar kuasaNa, emak si jadiken ia inganta cicio ras si ngajari kita.
Ibas tanggal 16 Oktober 2019 enda, Moria enggo genap umurna 62 tahun. Ibas umur si pe 62 tahunken enda moria enggo min erdewasana, tetap mengandalken Tuhan ras kepentarenNa. Amain gia enggo metua tetaplah erpenggurun ras erpenalemen man Dibata, gelah moria reh pentarna ibas ndalani kegeluhenna ras muat keputusen-keputusen ibas kegeluhenna. Arah umur pe 62 tahunken enda, moria semakin menjadi berkat ibas jabu, gereja ras masyarakat, jadi nande ingan tertande ras jadi tiang doa man isi jabu bage pe man gerejaNa.
Pdt Evlida br Ginting
Rg GBKP Klender