Suplemen PJJ : Johanes 19 : 38 - 42 : Tgl 26 April - 2 Mei 2020

Ogen  : Johanes 19:38-42

Thema  : Nehken Kekelengen Arah Budaya

Adi ngerana kita kerna budaya, akap kami enggo pe kita nggeluh ibas jaman kemajun enda, janah enggo bengket ibas Berita Si Meriah, labo salah dingen la mela nggit erlajar kita kerna si adi. Siman kebiarenken pepagi merga ras beru e nari ngenca tading (genduari pe beru ‘Br’ enggo mulai itadingken) ibas dirinta, apai ka pepagi adi lanai siangka ras lanai iantusi kerna ranan adat ntah pe orat nggeluhta. Kita kalak Karo enggo kap merap-marpar ku kerina penjuru doni, banci nggeluh sukses amin la pe penampat kade-kade, erkiteken sie nterem kalak Karo lanai erdiate nandangi adat Karo, terlebih alu nggejapken maka kai pe banci tembe adi lit lah duit. (Tempa-tempa lanai kita perlu anak beru erkuskas/erdakan sabap enggo mbue pangan banci ipesan; tole pe lanai kita perlu kalimbubu lampas reh ibas kerjanta guna maba osenta, erkiteken enggo mbue salon nikapkenca bulang-bulang ras tudungta). Emaka melala kita lanai sieteh tumburen guna ngayak-ngayak duit/kinibayaken/pangkat, lupa nandangi adat budaya, lupa erkade-kade, piah lanai mehamat erkalimbubu, lanai metenget/melias ersenina, ras lanai metami er anak beru. Piah dungna enggo bagi kuan-kuan Karo: “Tarum ngayak-ngayak siman tadingenken lupa siman ayaken (ersangkep nggeluh) piah dungna taneh sedepa ngenca sikerajangenta”.

Bahan PJJnta enda nuriken ibas paksa sie sekalak si tergelar Jusuf kalak Arimatea si tuhu-tuhu kagum nandangi pengajaren ras pelayanen Tuhan Jesus, tapi erbuni-buni ia kagum nandangi Tuhan Jesus erkiteken mbiar ia man kalak Jahudi. Ipindokenna man Pilatus gelah banci min ibuatna mait Jesus. Paksa sie eme persiapen wari Sabat kalak Jahudi. Erkiteken wari Sabat ibenaken kenca matawari seh ku sundutna, mait Tuhan Jesus harus mis ikuburken sope wari Sabat ibenaken. Sebab mindahken ras nguburken mait la banci ilakoken ibas wari Sabat. Jusuf kalak Arimatea enda eme anggota Mahkamah Agama Jahudi (Sanhendrin), si nentuken keputusen kerna kematen Jesus si harus ipakuken i kayu persilang. Anggota Mahkamah Agama Jahudi buena lit 71 kalak, janah paksa sie Jusuf kalak Arimatea enda ngenca si la setuju kerna ukumen si isehken man Tuhan Jesus. Ibas ia mindoken mait Tuhan Jesus e man Pilatus tuhu-tuhu ije Jusuf kalak Arimatea enda lanai iukurina kerna reputasina, erkiteken ia kalak penting. Paksa sie ise si jabatenna jadi anggota Mahkamah Agama Jahudi berarti ia kalak terpandang. Perlu ka sieteh kerina ise kalak Jahudi si menyentuh mait kalak mate berarti nggo lanai ipebadiakenna me dirina (menajiskan diri).

Bage ka pe kai siilakoken Nikodemus tuhu-tuhu resikona mberat man bana. Nikodemus ikataken ibas Kitab Johanes, ija ia ikataken ije sebage kalak Parisi ras pemimpin agama Jahudi (ertina ia pe sekalak anggota Mahkamah Agama Jahudi) si ndahi Jesus sanga tengah berngi (Joh. 3:1-21). Teridah Nikodemus enda tuhu-tuhu ras kagum nandangi biak ras pengajaren Tuhan Jesus, tapi mbiar ia tereteh teman-temanna kalak Parisi sideban. Nikodemus pe ikut ngelegi mait Jesus e. Ibabana kira-kira telu puluh kilo minak mur si isinggur ras minak gaharu.

Perlu sieteh kerina, ibas daerah Timur Tengah Kuno paksa sie, piga-piga rempah si ianggap sebage barang mewah si meherga (bnd. 1 Raj. 10:10,25; Esek. 27:17-22), khususna jenis si harus iimpor arah negeri-negeri si ndauh nari. Ibas jaman Padan Sindekah perdagangen rempah-rempah tuhu-tuhu iperdiateken pemerintahen Salomo alu mehuli. Salomo ndatken bea masuk pajak tiap kalak si ngelewati daerah kekuasanna guna maba rempah-rempah.

Perlu iterangken kami ijenda piga-piga batang mur mungkin turah i Palestina, tapi buen mur iimpor Arab ras Afrika Timur nari. Sejenis damar si leket si warnana terang enda maler arah batang-batangna. Kenca damar enda terkena udara, emaka keras me ia janah salih warnana jadi coklat. Damar mur ihancurken ras ipake guna erban balsam ras minak merim si seh kal mergana, termasuk minak badia guna upacara agama (Kel. 30:23-33). Mur pe ipake guna membalsem kalak mate, enda banci sinehen ibas ayat 39 bahan PJJnta enda.

Bage ka pe minak gaharu. Sejenis damar si merim batangna pe meganjang si turah i daerah Asia Tenggara ras India Utara, ntah tanamen gaharu si bulungna mekapal berbentuk mawar. Damar gaharu bauna seh kal merimna tapi nanamna seh kal pagitna. Gaharu ipake guna erban minak merim, tambar, ras membalsem kalak mate.

Sope mait ikuburken, biasana ibalsem alu rempah-rempah si itamaken/ibaluti alu kain puti, termasuk ije campuren mur ras gaharu. Rempah-rempah e la menahan pembusuken mait, tapi erguna sebage pembasmi bau busuk/bau macik bagepe tambar disinfeksi.

Mait Tuhan Jesus pe ibaluti alu kain putih. Janah kain putih si ibalutken ku mait Tuhan Jesus eme bahan si seh kal mergana. Erkiteken make kain putih ibas jaman Padan Sindekah merupaken sada kearusen man imam-imam (bnd. Kel. 28:39). Kerina jubah, sorban ras ikat pinggang bahanna arah kain putih nari (ibas Bahasa Indonesia ikataken kain lenan). Menurut cataten Pustaka/Alkitan pemaken kain putih (kain lenan) ihubungken ras kalak si istimewa, kalak badia. Kain putih (kain lenan) paksa sie ilambangken sebage pemere si bernilai tinggi man sekalak diberu si ikelengi sekalak dilaki.

Adi siidah arah keterangen enda, tuhu-tuhu luar biasa kai si ilakoken duana tokoh enda eme Jusuf kalak Arimatea ras Nikodemus guna nehken kehamaten man Tuhan Jesus. Man bana duana Tuhan Jesus e arus isehken kehamaten rikutken adat penguburen kalak Jahudi. Emaka inganNa ikuburken pe ibas peken (taman), kuburen pe si lenga pernah ipake, mait Jesus ibalutina alu kain putih (dagangen mbentar simeherga) janah itamakenna pe rempah-rempah rikutken adat penguburen kalak Jahudi. Ulih perbahanen Jusup kalak Arimatea ras Nikodemus enda tuhu-tuhu mereken serpang pulah ras pengapul man ajar-ajar Jesus ras sangkep nggeluh Jesus (bnd. Luk. 23:55-56).

Rikutken bahan PJJnta enda, iajuk me kita kerina selaku serayan Tuhan bage pe ngawan ni perpulungen guna nehken kekelengen ibas kegeluhenta, khususna salah sada dampar eme arah budaya ntah pe peradatenta kalak Karo. Ibas dampar kematen, bagi si ilakoken Jusup kalak Arimatea ras Nikodemus situhuna biak-biak si bage pe enggo idalanken orangtuanta ndube. Kerinana iarapken muat bagin maka banci erlayas perdalanen peradaten penguburen kalak si enggo mate. Asum runggu, icakapken me kerna wari penguburenna, ingan pulung, utang adat, inganna ikuburken, ertenah ntah pe ngayaki ras sidebanna. Tuhu, ibas dampar sienda, semalna kita selaku gereja pe muat bagin. Lit ka nge runggun si nikapken peti adi kune si mate e anggota perpulungenna. Bage pe diakonia pe sipedalan nge.

Arah sienda teridah maka arah kerina bentuk-bentuk dahin perdaten ibas kalak Karo mulai kin ibas bertin nari (ngembah manuk mbur), kenca tubuh seh anak perana/singuda-nguda, erjabu (nereh empo), kerja tahun, mengket rumah, ngelegi merga ras beru, nengget, nambari ose man orangtua, mereken ciken/kujam-kujam ras tuk-tuk, mate ras kerina berku-berkuna ku semin. Lit nge ibas kalak Karo oratna ras ranan adatna, gelah lit torosna perdalanen nggeluh (ratur bagi toros gula gajah), gia sekali ibas dampar keriahen ntah pe keguluten/ceda ate. Ibas sienda kerina tereteh maka kepeken kalak Karo enda kalak beluh, ija ia rusur rukur, “Ola sempat mindo kalak sipatut ia ngalo”. Teridah kekelengen e mbelin ibas pusuhna (em inti adat), gia pelain-lain bentukna, bagi ikataken: “keleng ate senina, adi keri page i rumah man berenken, page ibas keben pe ilegi; keleng ate anak beru (erturang) la bias bas busan bereken, tapi page ibas lebengen pe ikurkur; ras keleng ate kalimbubu benih iberekenna”.

Emaka iarapken arah bahan PJJnta sekali enda jadi me kita kalak Karo desken: “gelang sada tariken, timah sada pinuang; kerbo sada karang, jadi berkisen bunga baban ku tiga ia kerina, maka mejile nina kalak kenjahe, merim nina sikenjulu, lalit pandangen nina sikepultaken ras kesunduten; teridah ia pagi kalak siradat itengah-tengah negara-bangsa i doni enda”. Jadilah GBKP enda desken: “jabu silindung bulan, jadi ingan ngelepasken latih, beluh ngergaken jelma sinterem, njaga gelah sierga-ergan jelma sitading ije, ingan sada perarihen, rumah ingan singgah, ras nehken kekelengen”. “Jabu sendi gading, ingan sumpit ngadi, ingan pengadun jelma sinterem”. “Jabu kurung manik, rumah ingan arih-arih kerina jelma, jadi jabu perberita si meriah nandangi sangkep nggeluhna”.

Pdt. Andreas Pranata Meliala, S.Th

GBKP Rg. Cibinong