Suplemen PJJ : 1 Petrus 5 : 2 - 4 ; Tgt : 20-26 Oktober 2019
Ogen : 1 Petrus 5 : 2 - 4
Tema : “Mpermakani Rarasen Biri-Biri Dibata”
(Ngataken Bujur Ibas Enggo Dungna Perdalinen Pemilihen Pertua-Diaken)
I. Kata Perlebe
Patut kal kita ngataken bujur man Tuhan. Enggo itaruhkenNa gerejaNa GBKP si malem enda ndahiken dahin sekali ibas 5 tahun eme pesta iman “Pemilihen Pertua-Diaken” periode 2019-2024. Secara umum kerina tahapen-tahapen si lit ibas dahin enda enggo erdalan alu mehuli. Mulai kin tahap sosialisasi, pembinan man ngawan, terus ku pemilihen bakal calon ras penetapen calon. Ilanjutken ku pemilihen secara runggun. Kenca si e erbahan kursus man calon Pertua-Diaken. Jenari pengukuhen ras penangkuhen. Lit denga runggun lenga seh ku pelantiken BPMR si mbaru ras penetapen seksi/ komisi. Tapi secara umum buen runggun-runggun enggo ngelakokenca. Bageme Dibata ibas Tuhanta Jesus Kristus Simada Gereja nggo ngendesken dahin pelayanen e man banta Pandita, Pertua-Diaken. Kita me si igelari serayan Dibata, aron Tuhan. IendeskenNa biri-biriNa eme perpulungen man banta serayanNa guna si permakani ras si kepkep alu mehuli bagi si ngena ateNa.
II. Isi
Surat 1 Petrus enda ialamatken man kalak Kristen i bagin utara Asia Kitik (Turki). Kalak Kristen si merap marpar enda sangana ngenanami melala kiniseran erkiteken kinitekenna. Petrus ngerana man pertua-pertua perpulungen i Asia Kitik enda (ayat 1). Ipindona gelah pertua-pertua e mpermakani rarasen biri-biri si sangana ngenanami kiniseran. Pendilo Petrus enda ngingetken man banta uga ndube Tuhan Jesus jine nuruh Petrus mpermakani biri-biriNa. Sabab Petrus pernah mersoken Tuhan seh 3 kali. Mbuktiken kerna keleng atena man Jesus, ipindoNa gelah Petrus mpermakani perpulungenNa (Johanes 21:15-19). Si eteh ras-ras uga tutusna Petrus ndahiken persuruhen Tuhan Jesus e. Lanai sitik pe ia mbiar mpeseh kebenaren Kata Dibata aminna i lebe-lebe pejabat ras penguasa. La ia surut aminna ia iancam ras ipenjaraken. Uga ia tutus mpermakani rarasen e bageme ipindona man pertua-pertua bas mpermakani. Rarasen biri-biri (gereja/ perpulungen) e Dibata kap punana. Janah Dibata si merekenca man pertua-pertua e. Erkiteken si e Petrus mindo gelah pertua-pertua e ngepkepsa alu ukur meriah bagi si ngena ate Dibata, ola alu ukur mberat (ayat 2a).
Petrus ngingetken man pertua-pertua e kerna motivasi si payo dingen mehuli ibas mpermakani dingen ngepkep perpulungen. Sipemena: ola ngelai erkiteken mata duiten tapi erkiteken ukur ersuruhlah guna ngelayani (ayat 2b). Sipeduaken: ola erkiteken atendu merentahi perpulungen, tapi bahan diri jadi usihen man perpulungen e (ayat 3). La banci perayakenna kerna kekuasan doni tapi pelayanen.
Petrus ngingetken maka lit ulih, upah ibas mpermakani ras ngepkep rarasen biri-biri Dibata. Upah enda denggo ialoken. Upah enda ialoken asum reh pagi Kepala Permakan, Permakan Situhu-tuhu eme Tuhan Jesus peduakaliken. Man kalak si tutus mpermakani ras ngepkep perpulungen ialokenna me rudang-rudang tanda kehagan si la ermelus-melus (ayat 4). Rudang-rudang si merim si la ermelus-melus enda me tanda kehagan ras kemenangen.
III. Pengkenaina
1. Mpermakani eme sada dahin ibas bidang peternakan. Mpermakani membutuhken kemeteruken ukur, ketetapen ukur ras kinigenggengen. Mpermakani la terjeng mere pangan/ gagaten ngenca. Tapi pe mere minemsa, nambarisa kune sakit, mbalutisa kune luka, njagasa gelah ula lalar, ndarami seh dat si enggo ndempar, ras njagasa kune lit rubia-rubia si meliar atena njerngem biri-biri e. Bageme filosofi, jiwa ras semangat dahin enda ibaba ku bas dahin serayan Tuhan. Tuhan Jesus jine ngajarken kerna si enda. Jabaten Pandita, Pertua ras Diaken eme jabaten si enggo itetapken Dibata lako mpermakani ras ngepkep perpulungenNa.
2. Tema: “Mpermakani Rarasen Biri-Biri Dibata” (1 Petrus 5:2-4). Mpermakani rarasen biri-biri Dibata dahin si mehuli kap (1 Timotius 3:1). Emaka permanilah rarasenNa rikutken si ngena ate Dibata. Ingetlah janjita sope kita ikukuhken ras itangkuhken. Ninta ndube, “Tuhu bage ateku”. “Tuhu bage ateku” ertina kita erjanji ras komitmen lako tutus ndahiken persuruhen Tuhan. Si dahiken bagi si ngena ate Dibata. Labo ninta ‘tuhu bagi ateku’. Beda kal “Tuhu bage ateku” ras “Tuhu bagi ateku”. Aminna 1 huruf ngenca bedana tapi ertina seh kal petembilna. Sipemena, kita mpermakani bagi si ngena ate Dibata. Sipeduaken, kita mpermakani bagi ngena ateta saja, ate-ateta saja si ban. Adi bagi ateta (ukurta) nggit kita. Adi lang la kita nggit. Si darami lalap alasenta ngelak ras nulak dahin ras tanggung-jababta.
3. Mari si pepayo motivasi/ perayakenta bas mpermakani. Gelah kune nggeduk si pepinter, ras adi melket si murniken. Adi perayakenta terjeng gelar si merim ngenca marilah si pekena. Perayaken terjeng gelar ngenca teridah kap arah kisat ngelai, kisat ndahi perpulungen. Ola kal perayakenta terjeng gelar ngenca. Ola ngelai erkiteken lit canna, ndatken keuntungen materi, doni. Ingetlah maka kerangapen nangdangi duit eme sumbul kerina kejahaten (1 Timotius 6:10). Ngelailah erkiteken ukurta ersuruh ras meriah. Melayanilah apa adanya, bukan karena ada apa-apanya. Bagepe ola perayakenta guna ndatken kekuasan. Gelah banci kita merentahi kalak. I gereja la inganna merentahi tapi ersaksi ras ngelai.
4. Jadilah Pt-Dk usihen si mehuli man perpulungen. Jadi teladan ibas perukuren, pengerana, kejingkaten, kemeteruken ukur, erkeleng ate (bdk. 1 Timotius 4:12). Uga si tuhuna, kinatana: mpermakani ntah justru nuntut gelah ipermakani, ngelai ntah ielai, jadi usihen ntah jadi pandangen? Mari si renungken alu mbages. La kinlah kita jadi batu antuken erkiteken malas, sombong, meganjang ukur ras sok kuasa? Ula kal sempat jadi si enda bas kita serayan Tuhan.
5. Kita mpermakani alu tutus, patuh ras setia gelah meriah ukur Kepala Permakan eme Tuhanta Jesus Kristus. Enggo isikapkenNa upah man banta eme rudang-rudang si la ermelus-melus si jadi keriahen, kehagan, kemalemen ate ras kemenangen (bdk. Ketangkasen 2:10c). Si aloken me upah e tupung kerehenNa peduakaliken. Situhuna gundari nari pe pasu-pasuNa si aloken ras si nanami ibas kita mpermakani rarasenNa.
III. Diskusi
1. Biak-biak perman si kuga nge si perlu iusih i bas kegeluhenta?
2. Dukungen kai nge si banci si bahan man Pertua-Diakenta i bas periode enda?
Pdt Juris Tarigan
GBKP Rg Depok – Lenteng Agung